Выбрать язык
Книги Ветхого Завета
Книги Нового Завета
с русским текстом1Puavil da Timofei, Hristosan Iisusan käskyläzet, työtäh tervehytty kaikile Filippas eläjile Hristossah Iisussah uskojile da uskojien kanzukunnan kaččojile da diakonoile.2Armuo da rauhuttu teile Jumalas, meijän Tuataspäi, da Ižändäs Iisusas Hristosaspäi.
3Kiitän minun Jumalua ainos, konzu mustan teidy.4Ainos, konzu molimmos teijän kaikkien puoles, panen malittuu hyväs mieles,5sendäh gu alguudah myö olitto dai nygöi oletto yhtes meijänke jevangeliedu levittämäs.6Minä lujah uskon sih, gu Jumal, kudai pani alguh teis oman hyvän ruavon, vedäy sen loppuh Hristosan Iisusan tulendupäiväh suate.7Hyvin se i on minul muga duumaija teis kaikis, gu työ oletto minun sydämes, i ollen minä hos tyrmäs libo puolistamas da lujendamas jevangeliedu, työ kaikin oletto minunke vuittiniekat Jumalan hyvyös.8Jumal nägöy, kui minä atkaloičemmos da suvaičen teidy kaikkii muga, kui suvaiččou teidy Hristos Iisus.9Molimmos vie, gu teijän suvaičus kazvas da andas teile ainos vai enämbän tieduo da ellendysty kaikes,10sit työ tiijustazitto, mi on paras, da olizitto puhtahannu da soimuamattomannu Hristosan päiviä vuottajes,11da olizitto tävvet oigien elaijan andimii, kudamat roitahes Iisusan Hristosan kauti Jumalan kunnivokse da kiitändäkse.
12Vellet, tahton, gu tiedäzittö: se, midä minule rodih, avvutti jevangeliele mennä edehpäi.13Kai dvorčan vardoiččijat dai kaikin muut nähtih: minä olen čieppilöis Hristosan täh.14Äijät tägäläzet vellet uskojen Ižändäh suadih minun čieppilöin periä rohkevuttu i sanellah Jumalan sanua varuamattah da vie endisty julgiembah.15Erähät, toven sanuo, sanellah jevangeliedu Hristossah näh vai sendäh, gu vihatah meidy da tahtotah riijellä, no toizet sanellah puhtahal mielel.16Nämä toizet ruatah sidä suvaičuksen täh, gu tietäh: minä olen pandu puolistamah jevangeliedu.17A net enzimäzet sanellah Hristossah näh vai iččie duumaijen da pahua tahtojen, hyö smietitäh, tuvvah sil sanelendal minule tuskua minun čieppilöis.18Olgah kui tahto, no minä olen hyväs mieles, vai saneltas Hristossah näh luaduh libo toizeh, viizastellen libo oigieh.
Minä voin iellehgi olla hyväs mieles,19gu tiijän, teijän malittuloin vuoh da Iisusan Hristosan Hengen avul kai tämä roih minule piäzendäkse.20Vuotan da nad'eičemmos äijäl, gu minule ei rodei nimis huigei, a voin nygöigi, kui ainos, olla rohkiennu da tuvva kunnivuo Hristosale, elänen libo kuollen.21Minule elaigu on Hristos, a kuolendu - voitto.22No ku minul pidänöy vie eliä täs rungas, sit rodieu hyödyy minun ruavole. En tiijä, kudai vallita,23olen keskele kavonnuh. Tahtozin lähtie tiäpäi da olla Hristosanke, se olis äijiä parembi.24No teijän täh on parembi, gu minä jiän eloh.25Lujah uskon sih, i sendäh tiijän, jiän tänne da olen teijän kaikkienke, gu työ menizittö edehpäi uskos da suazitto sit hyviä mieldy.26Sit työ voitto minun periä vie enämbäl pidiä hyviä mieldy Iisusas Hristosas, konzu minä uvvessah tulen teijän luo.27Teil vai pidäy vediä iččie Hristosan jevangelien hinnan mugah. Piäzengo minä teijän luo vai en, näingo teidy vai en, no tahtozin kuulta, gu työ hengel oletto yhtes da yksimielizesti toruatto jevangelien da uskon puoles,28i etto anna vastustajile nimih luaduh pöllättiä iččie. Se on heile häviendän merki, a teile piäzendän merki, i se on Jumalaspäi.29Teile, näit, on annettu Hristosan täh ei vai uskuo Häneh, a vie tirpua gor'ua Hänen täh.30Työ oletto moizes toras, kudamas enne näittö minuu, da kudamas, kui nygöi kuuletto, minä viegi olen.
Глава 1