Выбрать язык
Книги Ветхого Завета
Книги Нового Завета
с русским текстом1Ga sit minä, kudai olen Ižändän täh tyrmäs, kehitän teidy elämäh muga, kui pidäy eliä Jumalan kučuttuloil.2Heitykkiä kaikes toine toizele, olgua hyväsanazennu da tirpačunnu, suvaijen kestäkkiä toine tostu.3Pangua kai väit, gu suas pidiä Hengen annettu yhtevys rauhuon vuoh.4On vai yksi rungu da yksi Hengi, muga kui on yksi se, mih teidy kučuttih nad'eimahes.5
On vai yksi Ižändy, yksi usko, yksi ristindy!
6On vai yksi Jumal, kaikkien Tuatto!
Häi on kaiken piäl, menöy kaikkeh da on kaikes.
7No jogahizele meis on annettu lahjakse n'ero sen mugah, kui Hristos on kaččonuh andua.8Onhäi sanottu:
- Häi nouzi yläh,
otti kerale kiiniotettuloi,
andoi lahjat rahvahile.
9Eigo tämä «Häi nouzi» merkiče sidä, gu Häi enne oli heittynyh alah, muan alimazih kohtih?10Kudai heityi alah, on se samaine, kudai nouzi yläh, kaikkii taivahii korgiembale, da täytti kaiken.11Häi andoi yksile n'eron olla uskojien kanzukunnas apostolannu, toizile andoi n'eron olla Jumalan iänenkandajannu, erähile - jevangelistannu, erähile - kanzukunnan kaččojannu da opastajannu,12- i kai se, gu valmistua jumalanuskojat sluužinduruadoh, Hristosan rungan nostanduruadoh,13kuni kaikin emmo yhty uskos da Jumalan Poijan tundemizes. I muga myö vadrastummo da roimmokseh täyzi-igäzet, Hristosan täydehyöh suate kazvanuot.14Sit myö jo emmo ole gu pienet lapset, kudamat häilytäh čurah toizeh kaikenjyttymien opastandutuulien kanneltavannu da kudamat ollah ounastelijoin da muanittelijoin vedeltävänny.15Sit myö pyzymmö toves da suvaičendas i kaikelleh kazvammo kiini Hristossah, Häneh, kudai on piä.16Häi sidou yhteh kaiken rungan da kaikkien nivelien vuoh pidäy sidä tukus, sen joga kohtaine ruadau omua ruaduo, i nenga rungu kazvau da kohenou suvaičendas.
17Sendäh minä sanon teile lujah Ižändän nimes: älgiä enämbiä eläkkiä kui Jumalua tundemattomat eletäh! Heijän duumat ollah tyhjät,18heijän mielet ollah pimiet, hyö on vieravuttu jumalahizes elaijas, sikse gu ollah tiedämättömät, da sydämet heijän on kovettu.19Hyö ollah huijuttomat, hyö heityttih elämäh vällil veriälöil da ollah täydymättömät kaikenjyttymis paganruadolois.20No ei teile nengostu opastettu Hristossah näh!21Onhäi teile saneltu Hänes, teile on opastettu se tozi, kudai Iisusas on.22Teidy opastettih hylgiämäh endine elaigu, teis olii vahnu ristikanzu, kudamua loppietah muanittelijat himot.23Otakkua uvvet mielet, uuzi hengi,24šuoriettokseh uudeh ristikanzah, kudai on luajittu Jumalan kuvan mugah, elämäh pyhiä elaigua oigiel da tovel.
25Hylläkkiä sit kielastus, paiskua tottu toine toizenke, gu myö olemmo yhty rungua.26Suuttuhuugi älgiä luajikkua riähkiä. Luajikkua sobu, enne ku päiväine laskeh,27älgiägo annakkua sijua pahalazele.28Varras anna ei varrasta enämbiä, a parembi menöy ruadoh, ruadau omil käzil putin ruaduo, sit on mis andua niilöilegi, kel on hädä.29Anna nimittuine paha sana ei lähte teijän suus, a paiskua sidä, mi on hyvä, mi avvuttau i roih kuulijoile hyväkse.30Älgiä tuogua pahua mieldy Jumalan Pyhäle Hengele, kudai on annettu teile pečatikse sih päiväh niškoi, konzu meidy piästetäh välläle kaikes pahas.31Älgiä piekkiä vihua vačas, hylläkkiä tabavundu, suutundu, heitäkkiä riidelendy, toine toizen kiruondu, olgah kai paha eriže teis.32Olgua hyvät toine tostu vaste, žiälöikkiä da prostikkua toine tostu, muga kui Jumalgi prostii teidy Hristosan täh.
Глава 4