Выбрать язык
Книги Ветхого Завета
Книги Нового Завета
с русским текстом1Puavil, Jumalan tahtos Hristosan Iisusan apostol, työndäy tervehytty Efesas eläjile jumalanuskojile, kudamat suremattah uskotah Hristossah Iisussah.2Armuo da rauhuttu teile Jumalas, meijän Tuataspäi, da Ižändäs Iisusas Hristosaspäi!
3Ylendetty olgah meijän Ižändän Iisusan Hristosan Jumal da Tuatto! Häi on Hristosan kauti blahoslovinnuh meidy kaikil Hengespäi tulluzil hyvyzil, midä on taivahallizis muailmois.4Häi valličči meidy Hristosas jo enne ilmoin alguu, gu olizimmo myö pyhät da vijattomat Hänen ies da eläzimmö suvaičukses.5Jumal jo ielpäi lepii meidy rodiemah Hänen omikse lapsikse Iisusan Hristosan kauti, moine oli Hänen hyvä tahto.6Ga kiitäkkiämmö sit Jumalua Hänen sanomattoman suuren hyvyön täh, kudaman Häi andoi meile oman armahan Poijan kauti.
7Hristosan veren hinnal myö olemmo piästetyt välläle da saimmo prosken'n'an hairahtuksis. Moine agjatoi on Jumalan hyvys,8kudamua Häi kaikes omas mielevyös da ellendykses on andanuh meile žiälöiččemättäh.9Häi jiävii meile oman peitospietyn tahton, kudaman Häi omas hyvyös jo ielpäi kačoi täyttiä Hristosan kauti,10konzu aijat täytytäh: Hänen mieli oli suaja Hristosas yhteh kai, midä on taivahis dai mual.
11Hristosas myö saimmo kodivuitin, muga kui Jumal oli ielpäi kaččonuh da pannuh - Häi, kudai luadiu muga, ga kai rodieu Hänen tahton da piätöksen mugah.12Sikse meil, kudamat enzimäzinny panimmo nad'oužan Hristossah, pidäy eliä muga, gu meijän elaigu menis Jumalan taivahallizen valgien ylendämizekse.13Hristosas työgi saitto pečatikse uskaldetun Pyhän Hengen, konzu kuulitto toven sanan, hyvän viestin teijän piäzendäh näh, da rubeitto uskomah Häneh.14Se Hengi on annettu meile uskalmokse meijän kodivuitis sih suate, kuni Jumal ei piästä välläle omua rahvastu - kai Hänen taivahallizen valgien ylendämizekse.
15Sendäh minägi, ku kuulin, kui työ uskotto Ižändäh Iisussah da suvaičetto kaikkii jumalanuskojii,16heittelemättäh kiitän Jumalua teijän täh, konzu mainičen teidy omis malittulois.17Minä molimmos, gu meijän Ižändän Iisusan Hristosan Jumal, taivahallizen valgien Tuatto, andas teile mielevyön da jiävindän Hengen, gu työ opastuzitto tiedämäh Händy,18i Häi avuas teijän sydämen silmät nägemäh, mittumah nad'oužah Häi on teidy kuččunuh, mittuman suuren da bohatan kodivuitin Häi andau jumalanuskojile,19i mittuine agjatoi suuri on Hänen vägi, kudai ruadau meis, uskojis. Juuri se on se suuri vägi,20kudaman Häi ozutti Hristosas, konzu nostatti Händy kuollielois da pani istumah iččeh oigiele puolele taivahis,21ylembäkse kaikkii vallanpidäjii, valdoi, vägilöi dai kaikkie herruttu dai joga nimie, kudai mainitah nygözes dai tulies muailmas.22Jumal painoi kaikkii Hänen jalloin alle i pani Händy korgiembale kaikkie, uskojien kanzukunnan piäkse.23Uskojien kanzukundu on Hristosan rungu i Hänen täydehys, Hänen, kudai täyttäy kaikes kai.
Глава 1