Выбрать язык
Книги Ветхого Завета
Книги Нового Завета
с русским текстом1Hristos piästi meidy välläle, nygöi myö olemmo vällät. Olgua sit lujannu, älgiä annakkua siduo iččie uvvessah orjan čieppilöih.2Kuunnelkua! Minä, Puavil, sanon teile: gu andanetto ymbärileikata iččie, sit Hristosas teile ei rodei nimidä hyviä.3Sanon vie kerran jogahizele, kudai ymbärileikkavuttau iččie: hänel pidäy täyttiä kai Zakon.4Työ, kudamat opitto piästä oigiekse Zakonan täyttämizen kauti, leikkaitto iččie iäre Hristosas, eroitto Jumalan hyvyös.5No myö nad'eičemmokseh, gu Jumal piästäy meidy oigiekse. Myö vuotammo sidä Hengel, kudai on meis uskon kauti.6Gu ristikanzu elänöy Hristosas Iisusas, on yksikai, ongo häi ymbärileikattu vai ei. Ainavo, mi on tärgei, on usko, kudai nägyy suvaičendan kauti.7Työ hyvin menittö edehpäi. Kenbo teidy azetti, gu työ etto enämbiä kuundele toven sanoi?8Teidy ei lämmytännyh sih Jumal, kudai teidy kuččuu.9«N'äppine muijotestu muijottau kogo taiginan.»10Ižändäh uskojen minä pien varmuon, työ etto rubie duumaiččemah toizin gu minä. No se, ken sevoitti teijän mielet, suau Jumalan suvvon, olgah häi kentahto.11No gu minä, vellet, iellehgi puolistazin ymbärileikkuandua, ga miksebo sit minuu painetah? Sithäi minun paginat ristah näh ei enämbiä satatettas nikedä.12A net teijän smuttijat salvatettahes iččie!
13Teidy, vellet, on kučuttu elämäh välläl. No älgiä vällyön nimel piästäkkiä välläle omua riähkähisty tabua, a suvaijen avvutakkua toine tostu.14Kogo Zakon on täs yhtes käskys: «Suvaiče lähimästy gu omua iččie.»15No gu työ puretteletto da syöttö toine tostu, sit vardoikkuattokseh, gu etto hävittäs toine tostu kogonah.16Minä sanon: eläkkiä kui Hengi käsköy, i sit työ etto täytä riähkähizen tavan himoloi.17Riähkähine taba tahtou tostu gu Hengi, Hengi - tostu gu riähkähine taba. Net ollah toine tostu vastah, i sikse työ etto rua sidä, midä tahtotto.18No ku Hengi vedäy teidy, työ etto ole Zakonan vallan al.
19Riähkähizen tavan ruavot ollah nägeväzet. Net ollah: karguandu, paganruavot, vällil veriälöil eländy,20kumardelendu valehjumaloile, tiedovoičendu, vihuandu, riijat, toizeh varuandu, tabavundu, iččehpäi viendy, erimielizys da sen periä eruondu joukkoloih,21kadehtindu, humaloičendu, piruičendu da muut moizet. Sanon nygöi, kui sanoin jo ennegi: ket nengostu luajitah, net ei suaja kodivuittii Jumalan valdukunnas.22A Hengi kazvattau meis suvaičendua, iluo, rauhuttu, tirpandua, leppevytty, hyvytty, suremattomuttu,23pehmevytty, ičen käzis pidämisty. Niilöi vastah ei ole Zakon.24Net, kudamat kuulutah Hristosale Iisusale, nuaglittih ristah oma riähkähine taba kaikkien sen tahtoloin da himoloinke.25Ku kerran myö elämmö Hengel, ga annakkuammo sit Hengele i vediä meidy.26Meile ei pie eččie ičele čestii, eigo pie tuskevuttua toine tostu da kadehtie toine tostu.
Глава 5