Выбрать язык
Книги Ветхого Завета
Книги Нового Завета
с русским текстом1Työ mielettömät galatalazet, kenbo teidy tiedovoičči! Tuodihhäi teijän silmien edeh nähtäväkse Iisus Hristos ristah nuaglitunnu!2Sanokkua minule vai yksi: Zakonan täytändälgo saitto Hengen, vai sil, gu kuulitto jevangelien da uskoitto sih?3Moizetgo mielettömät oletto! Työ alloitto Hengen avul. Omil vägilöilgo nygöi tahtotto piästä agjah?4Tirpittögo sit työ sudre nenga äijän - gu se liennou olluh sudre?5Sendähgo andau Jumal teile Hengen da luadiu suurii ruadoloi teijän keskes, gu novvatto Zakonua, vai sendäh, gu uskoitto jevangelieh, kudaman kuulitto?
6Otammo hos Avraaman: «Häi uskoi Jumalua, i sikse Jumal kačoi händy oigiekse.»7Ga sit tiijäkkiä: tovellizet Avraaman jälgeläzet ollah net, kudamil on usko.8Pyhät Kirjutukset annettih tiediä jo ielpäi, gu Jumal luadiu oigiekse Händy tundemattomat rahvahat heijän uskon täh, da net Kirjutukset jo ielpäi tuodih Avraamale hyvä viesti: «Sinun kauti Jumal blahosloviu kaikkii rahvahii.»9Ga sit niilöi, kel on usko, blahoslovitah yhtes uskojan Avraamanke.
10A net, kudamat opitah piästä oigiekse Zakonan täytändäl, ollah kirotut, gu on kirjutettu: «Kirottu on jogahine, kudai ei ainos täytä kaikkie, midä on kirjutettu Zakonan kniigah.»11On tiettäväine, gu niken ei rodei Jumalan silmis oigiekse Zakonan täytändäl, sendäh gu «oigei eläy uskol».12Zakon ei jätä nimittumua sijua uskole, a sanou: «Ken luadiu, midä Zakon käsköy, suau sen vuoh elaijan.»
13Hristos piästi meidy Zakonan kirovos sil, gu rodih iče kirottu meis tuači, kui on sanottu Pyhis Kirjutuksis: «Kirottu on jogahine, kudai on suudittu puuh kuolemah.»14Nenga rodih, gu Iisusas Hristosas Jumalua tundemattomat rahvahatgi suadas Avraamale uskaldetun blahosloven'n'an, i muga myö uskon vuoh suazimmo uskaldetun Hengen.
15Vellet, otammo hos meijän jogapäiväzen elaijan. Ristikanzangi luajittuu da zakonoi myö lujendettuu sobuu ei voi kumata niken, eigo voi ližätä sih nimidä.16Jumalan uskalmot annettih Avraamale da hänen jälgeläzele. Pyhis Kirjutuksis ei sanota «jälgeläzile», se merkiččis äijii, a sanotah: «sinun jälgeläzele», se merkiččöy yhty, i se on Hristos.17Tarkoitan tädä: Jumalan luajittuu da lujendettuu sobuu ei voi kumata n'elliäsadua kolmiekymmendy vuottu myöhembi tulluh Zakon i muga luadie tyhjäkse se, mi oli uskaldettu.18Gu kodivuitin suamine olis kiini Zakonas, se jo ei tulis uskalmon kauti. A Jumal andoi kodivuitin Avraamale sendäh, gu oli ielpäi uskaldannuh.
19Mih niškoi sit on Zakon? Se oli jällespäi ližätty ozuttamah pahoi ruadoloi, kuni ei tule se Avraaman jälgeläine, kudamua uskalmo koskeh. Anhelit tuodih Zakon keskusmiehele, kudai andoi sen rahvahale.20A keskusmiesty ei pie, konzu dielos on vai yksi puoli. Jumal on yksi.
21Menöygo sit Zakon ristai Jumalan uskalmoloinke? Tiettäväine, ei! Gu ollus annettu Zakon, kudai vois luadie ristikanzan eläväkse, sit ristikanzu toven rodies oigei, gu täyttäs sen.22No Pyhät Kirjutukset sanotah, gu kai ristikanzat ollah riähkän čieppilöis, ga sit se, mi on uskaldettu, annetah vaiku niilöile, ken uskou Iisussah Hristossah.
23No enne gu tuli uskon aigu, Zakon vardoičči meidy salvaččimien tagan, kuni ei jiävinyhes usko.24Muga Zakon rodih meijän kaččojakse Hristosan tulendah suate, gu myö sit rodiezimmokseh oigiet uskol.25A nygöi gu tuli usko, myö jo emmo ole kaččojan vallan al.
26Työ kaikin oletto Jumalan lapset, gu uskotto Hristossah Iisussah.27Kaikin työ, ket oletto ristitty Hristossah, panitto piäle Hristosan.28Ei jo ole jevreidy eigo gretsielästy, ei orjua eigo välläl olijua, ei miesty eigo naistu, sikse gu Hristosas Iisusas työ kaikin oletto yhtes.29I gu kerran työ oletto Hristosan, sit työ oletto Avraaman jälgeläzet i suatto kodivuitin, kudai hänele uskaldettih.
Глава 3