Выбрать язык
Книги Ветхого Завета
Книги Нового Завета
с русским текстом1Vellet, tahtommo, gu tiedäzittö, mittuman hyvyön Jumal on andanuh uskojien kanzukunnile Makedonies.2Hos niilöi opittih kaikenjyttymil goril, uskojat oldih muga tävvet iluo, ga syväs köyhyösgi oldih ainos valmehet andamah tävvel käil.3Hyö annettih, min voidih da vie enämbängi - sen minä näin. Hyö iče tuldih da4kaikelleh pokoroittihes, gu myö olizimmo moizet hyvät da ottazimmo heidy yhtehizeh ruadoh, avvuttamah jumalanuskojii.5Hyö ruattih ei vai sidä, midä myö vuotimmo heis, a annettih iččie Jumalan tahton mugah enzimäzikse Ižändäle da sit meilegi.6Sikse myö kehitimmö Tiittua jatkamah da vedämäh loppuh suate sen hyvän dielon, kudaman häi algoi teijän keskes.7I kui teil on kaikkie kybimänkylläl, on uskuo dai paginn'eruo, tieduo dai rakkahuttu ruadoh, on sidä suvaičustu, kudai meis tuli teih, ga sit annakkuagi tävvel käil.8En sano tädä gu käskie. Sanon toizien rad'en'n'ah näh, a sen vuoh tahton tiijustua, suvaičettogo työ tovel.9Työhäi tiijättö Ižändän Iisusan Hristosan hyvyön: Häi oli bohattu, no rodih köyhäkse teijän täh, gu työ bohattuzitto Hänen köyhyöl.10Annan teile hyvän n'evvon täs dielos. Mulloi työ olitto enzimäzet, ei vai ruadamah, no tahtomahgi.11Ga vedäkkiä se ruado nygöi loppuh suate! Kui palavasti sidä tahtoitto, muga viegiä se agjah suate omii taguzii myö.12Gu andai tahtou andua, Jumal ottau hyvänny sen, midä andajal on, eigo vuota hänes sidä, midä hänel ei ole.13Kyzymys ei ole sit, gu luadie toizile kebjiembi, a teile jygiembi, a ku olis kaikile yhtenverdu.14Nygöi teil on kylläl, i työ voitto avvuttua hädähizii, a konzu heil on kylläl, hyö voijah avvuttua teidy hiäs, i muga rodieu kaikile yhtenverdu.15Onhäi kirjutettu:
Ken keräi äijän,
sil ei olluh liigua.
Ken keräi vähän,
sil ei olluh hädiä.
16Passibo Jumalale, kudai pani Tiitangi sydämeh moizen, kui minul, rakkahuon avvuttua teidy.17Häi kuuli minun kehityksen, no hänes ičesgi on moine suuri rakkahus, ga häi omal himol lähtöy teijän luo.18Hänenke työnnämmö vie yhty uskovellie, kudamua kaikis uskojien kanzukunnis kiitetäh, sikse gu häi hyväl himol ruadau jevangelien hyväkse.19Paiči sidä, kanzukunnatgi vallittih händy meijän matkuvellekse vedämäh sidä lahjua, kudamua myö hommuammo Ižändän kunnivokse da meijän avvutanduhimon merkikse.20I nenga myö vardoičemmokseh, gu emmo puuttus nikenen soimattavakse nämien suurien d'engoin täh, kudamat on uskottu meijän käzih.21Tahtommo, gu kai olis hyvin ei vai Jumalan silmis, no i rahvahien silmis.22Työnnämmö heijänke matkah vie yhten uskovellen, kudaman ruadohimon myö puaksuh näimmö äijäs kohtas da kudai nygöi vie enämbäl pyrgihes ruadoh, gu lujah uskou teih.23A ku sanuo Tiittah näh, häi on minun ruadovelli, häi ruadau teijän hyvyökse yhtes minunke, a nämä vellet ollah uskojien kanzukunnispäi työtyt, hyö ollah Hristosan kunnivonnu.24Ozutakkua sit, kui työ suvaičetto heidy, anna uskojien kanzukunnat tiijustetah, myö emmo tyhjiä löyhkä teis.
Глава 8