Выбрать язык
Книги Ветхого Завета
Книги Нового Завета
с русским текстом1Puavil, Jumalan tahtos Iisusan Hristosan apostolakse pandu, da velli Timofei työtäh tervehytty Korinfas olijale Jumalan kanzukunnale da kaikile jumalanuskojile kogo Ahaijas.2Armuo da rauhuttu teile Jumalas, meijän Tuataspäi, da Ižändäs Iisusas Hristosaspäi.
3Ylendetty olgah meijän Ižändän Hristosan Iisusan Jumal da Tuatto, armolline Tuatto, kudai kaikelleh meidy kannattau!4Häi kannattau meidy kaikis goris, gu sil Hänespäi suavul kannatandal myö voizimmo kannattua toizii, kudamat ollah kaikenjyttymis goris.5Kui Hristosan gor'at nostah piäliči rannois meijän elaijas, muga nouzou Hristosan meile annettu kannatusgi.6Gu myö tirpammo gor'ua, ga se rodieu teile kannatuksekse da piäzendäkse. Gu myö suammo kannatustu, segi roih teile kannatuksekse da auttau kestiä net samazet gor'at, kudamat ollah meil.7Myö lujah uskommo: työ kestättö. Tiijämmö, kui työ suatto oman vuitin tuskis, muga suatto oman vuitin kannatuksesgi.
8Emmo tahto jättiä teidy tiedämättömikse, vellet, mittumis goris myö olimmo Aazies. Puutuimmo moizih piäličimiäräzih da meijän vägilöi suurembih vaigevuksih, ga emmo jo uskonuh, jiämmö hengih.9Myö tunzimmo iččie jo surmah suudittuloinnu, gu nad'eijakseh ei omah iččeh, a vai Jumalah, kudai nostattau kuolluziigi.10Häi piästi meidy nengomas pahas surmas, i viegi piästäy. Häneh myö nad'eičemmokseh, Häi iellehpäigi rubieu piästämäh meidy,11gu työgi avvutatto meidy malittuloil. Sit äijät kiitetäh Jumalua hyvyös, kudaman Häi luadii meile, gu vastai äijien malittuloih.
12Myö menemmö hyväkse sil, gu kaikkiel muailmas, semmite teijän keskes, myö elimmö kui käsköy Jumal, tovel da puhtahuol. Sen tovestau meijän hengigi. Meidy vedi ei tämän muailman viizahus, a Jumalan hyvys.13I myö emmo kirjuta teile nimidä muudu, vai sen, midä työ luvetto da ellendättö. Uskon, työ rubietto ellendämäh agjah suate sen,14gu Ižändän Iisusan tulendupäivänny työ voitto mennä hyväkse meis muga kui myö teis. Kuda-midähäi työ jo ellendättö.
15Täh uskojen minul oli mieli enzimäi tulla teijän luo, gu työ kaksi kerdua suannuzitto hyvyön.16Kačo, minä tahtoin teijän kauti mennä Makedonieh da siepäi tulla järilleh teijän luo, da sit työ varustannuzitto minuu matkah Juudieh.17Gu nengozet oldih minun mielet, ga olingo sit kebjeimieline? Ruavoingo minä omua iččie myö? Sanongo «Da, da», konzu tahton sanuo «Ei, ei»?18Muga kui Jumal on surematoi, mugai minä en sano teile konzugo «da», konzugo «ei».19Jumalan Poigu Iisus Hristos, kudamah näh minä, Siluan da Timofei sanelimmo teile, ei Häi sih niškoi tulluh, gu olla sego «da» sego «ei». Hänes on vai «da».20Mi äijy Jumalan uskalmuo on, kai net ollah Hänes «da». Sendäh myö sanommo Hänen kauti «amin'» Jumalan kunnivokse.21A Jumal, kudai lujendau meidy yhtes teijänke uskos Hristossah, Voijeltuh, Häi voideli meidygi;22Häi pani meih oman pečatin da andoi oman Hengen meijän sydämih merkikse sit, gu myö olemmo Hänen.23Kučun Jumalua tovestajakse: minä eistin Korinfan matkan vai sendäh, gu žiälöičin teidy.24Myö emmo tahto ižändöijä teijän uskuo, myö vai ruammo yhtes teijänke, gu tuvva teile iluo. Uskohäi teil on luja.
Глава 1