Выбрать язык
Книги Ветхого Завета
Книги Нового Завета
с русским текстом1A gu paista, vellet, Hengespäi tulluzis n'erolois, tahton, gu työ tiedäzittö niilöih näh toven.2Tiijättöhäi, konzu työ olitto vie Jumalua tundemattomat, teidy vedeltih kielettömien valehjumaloin luo, kui vai tahtottih.3Sendäh minä sanon teile, gu ellendäzittö: niken, kudai pagizou Jumalan Hengen vallas, ei sano: «Iisus olgah kirottu», i niken ei voi sanuo muite, gu vai Pyhän Hengen vallas: «Iisus on Ižändy.»
4N'erot ollah kaikenjyttymät, a Hengi on yksi,5sluužindua on kaikenjyttymiä, no Ižändy on yksi.6Ruaduo on kaikenjyttymiä, no Jumal, kudai ruadau kaikis kai, on yksi.7Häi andau Hengele jiäviekseh jogahizes eri luaduh yhtehizekse hyvyökse.8Yhtele andau Hengen kauti mielevyön sanat, toizele - tiedoloin sanat sen samazen Hengen kauti.9Yhtele andau uskon sen samazen Hengen kauti, toizele - parandamizen n'erot sen Hengen kauti,10erähäle - luadie suurii ruadoloi; erähäle - väin olla Jumalan iänenkandajannu, erähäle - n'eron eroittua, mi on mis henges tulluh, erähäle - n'eron paista kielil, erähäle - n'eron sellittiä nämii kielii.11No kaiken tämän luadiu yksi samaine Hengi, kudai andau n'erot jogahizele, kui Häi tahtou.
12Kui rungu on yksi, i sit on äijy kohtua, no kai net, hos niilöi on äijy, ollah yksi rungu - moine on Hristosgi.13Myöhäi kaikin olemmo yhtel Hengel ristityt yhtekse rungakse, olemmogo sit jevreit vai gretsieläzet, olemmogo orjat vai vällät, i meile kaikile on annettu juvva yhty Hengie.
14Eihäi rungu ole luajittu yhtes rungan palazes, a sit on äijy palastu.15Gu jalgu sanonou: «Minä en kuulu rungah, gu en ole käzi», ga eigo sit se yksikai kuulu rungah?16Gu korvu sanonou: «Gu minä en ole silmy, ga sit en kuulu rungah», ga eigo se sit kuulu rungah?17Gu kai rungu olis yksi silmy, kusbo sit olis kuulo? A ku kogo rungu olis yksi kuulo, kuibo sit n'uustazimmo?18No Jumal pani kai palazet rungah, kui Häi tahtoi.19Gu kai oldas vai yhtenny rungan palazennu, kusbo sit olis rungu?20No tälleh palastu on äijy, a rungu on yksi.
21Silmy ei voi sanuo käile: «Minule ei pie sinuu», eigo piä - jalloile: «Minule ei pie teidy.»22Vai ilmai niilöi rungan palazii, kudamat ozutetahes muidu vähävägizembänny, meil ei sua vältiä.23Net rungan palazet, kudamat meijän mieles ollah vähembäl počitoittavat, myö peitämmö suurel huolel. A net, kudamii huijustelemmokseh, peitämmö vie tarkembah.24Niilöi rungan palazii, kudamii emmo huijustai, ei pie peittiä. Jumal muga keräi tukkuh rungan, ga andoi suuremban počotan niilöile palazile, kudamii emmo pie hinnois,25gu rungas ei olis riidua, a kai palazet yhtenjytyi piettäs huoldu toine toizes.26Gu ollou gor'a yhtele rungan palazele, sit senke tirpetäh gor'ua kai palazet, a ku kudamale rungan palazele ozutettaneh čestii, sit kai palazet pietäh senke hyviä mieldy.
27Työ oletto Hristosan rungu, a jogahine teis on sen rungan palaine.28Uskojien kanzukunnas Jumal enzimäzikse pani erähii apostoloikse, sit erähii Jumalan iänenkandajikse, ielleh erähii opastajikse, erähile andoi väin luadie suurii ruadoloi, erähile - parandamizen n'erot, a erähile - avvuttua toizile, erähile - n'eron ižändöijä, erähile - paista kielil.29Ollahgo kaikin apostolat? Ollahgo kaikin Jumalan iänenkandajat? Luajitahgo kaikin suurii ruadoloi?30Ollahgo kaikil parandamizen n'erot? Paistahgo kaikin kielil? Voijahgo kaikin sellittiä kielii?
31Ečikkiä parahii hengellizii n'eroloi! A minä ozutan teile kaikis parahan dorogan.
Глава 12