Выбрать язык
Книги Ветхого Завета
Книги Нового Завета
с русским текстом1Engo minä ole välly? Engo minä ole apostol? Engo minä nähnyh Iisussua, meijän Ižändiä? Eigo se ole minun ruavon tulos, gu työ oletto Ižändäs?2Toinah muut ei pietä minuu apostolannu, no teijän kačo apostol minä olen. Työ oletto pečatti, kudai lujendau sen, gu minä olen Ižändän apostol.
3Niilöin ies, kudamat minuu suuditah, minä puolistan iččie nenga:4Eigo meil ole valdua syvvä da juvva?5Eigo meilgi ole valdua matkois olles pidiä rinnal akku, uskosizär, kui ruatah muut apostolat, Ižändän vellet da Kifa?6Pidäygo vai meil Varnavanke suaha elätys toizel ruavol?7Ken lähtöy sluužimah saldatakse omah d'engah? Ken viinumuarjupellon istuttahuu ei syö sen andimii? Libo ken paimendau lambahii da kozii da ei syö niilöin maiduo?
8En minä sanele täs vai ristikanzan mielii. Eigo Zakongi sano sidä?9Onhäi Moisein Zakonas sanottu: «Älä sivo puimas olijan häkin suudu.» Häkkilöigo Jumal täs huoliu?10Eigo Häi sano tädä juuri meih niškoi? Meih niškoihäi on kirjutettu: «Kyndäjäl kyndäjes da puijal puijes pidäy uskuo: häi suau täs oman vuitin.»11Gu myö kylvimmö teih hengellizen, rodiesgo liigua, gu leikkuazimmo teis einehellizen?12Gu muil ollou valdu ottua teis midägi, eigo meil sidä enämbäl? No myö nikonzu emmo eččinyh tädä valdua, a kestämmö kai, gu ei panna nimidä Hristosan jevangelien tiele.
13Ettogo työ tiijä, gu jumalankois ruadajat suahah sie elätyksen, a net, kudamat iškietäh žertvoi, suahah altarile tuodulois žertvois oman vuitin.14Muga Ižändy pani täsgi: jevangelien sanelii eläy jevangelien vuoh.15No minä nikonzu en ajanuh jälles ni yhty nämis oigevuksis. En ni nygöi kirjuta sikse, gu net minule annettas. Parembi kuolen! Tädä ylbevytty minul niken ei ota!16Sil, gu minä sanelen jevangeliedu, ei ole midä löyhkiä, se ruado on minun ruattavu. Paha rodies minule, gu heittäzin jevangelien sanelendan!17Gu ruadanen sidä omal himol, minä suan palkan. A gu en rua omal himol, sit minä vai ruan minule annettuu ruaduo.18Mittuine sit on minun palku? Se palku on, gu minä sanelen jevangeliedu palkattah, engo eči nimidä, mih minul olis valdu jevangelien sanelijannu.
19Hos olen välläl kaikis, iče heityin kaikkien käskyläzekse, gu suaha Hristosan puolele muga äijii, kui vai voibi.20Gu suaha jevreilöi Hristosan puolele, olin heile jevreinny; gu suaha Zakonua myö eläjii, olin heile gu Zakonua myö eläi, hos iče en ole Zakonan alaine.21Gu suaha Zakonattah eläjii, olin heile gu Zakonattah eläi, hos en ole Zakonattah eläi - olenhäi Hristosan Zakonan alaine.22Gu suaha vähävägizii, olin heile gu vähävägine. Kaikile minä olin kaikennu, gu kuitahto piästiä hos erähii.23Kaiken tämän luajiin jevangelien täh sidä periä, gu ičegi suazin sen hyvyzii.
24Tiijättöhäi, kiistai juostes juostah kaikin, no voittajan venkan suau vai yksi. Juoskua sit muga, gu suazitto sen.25Joga kiistahjuoksii pidäy iččie käzis, yhtet sendäh, gu suaha venku, kudai on häviejy, a myö - gu suaha häviemätöi.26Sikse minä en juokse kui piäkandau, kulakkazilleh olles en tyhjiä huškuta käzii.27Minä kulakoičen omua rungua da väistän sen omah valdah, eiga toizile jevangeliedu sanelles minuu iččie jätetäh bokkah.
Глава 9