Выбрать язык
Книги Ветхого Завета
Книги Нового Завета
с русским текстом1Gu teijän keskes keltahto ollou mittuine riidudielo toizeh, kuibo julgenou häi lähtie sellittämäh sidä mieron suddien edeh? Mikse häi ei jätä sidä jumalanuskojien sellitettäväkse?2Ettogo työ tiijä sidä, gu jumalanuskojat roijah kerran muailman suddikse? Gu työ voitto suudie muailmua, ettogo sit pädis suudimah nämii tyhjii dieloloi?3Ettogo tiijä, gu myö rubiemmo suudimah anheliloigi - emmogo sit vois suudie muallizii dieloloi?4No konzu teil on riidua mittumistahto muallizis dielolois, työ otatto suddikse moizii, kudamil uskojien kanzukunnas ei ole nimittumua hindua.5Sanon tämän teijän huigiekse. Eigo teijän omas joukos ole ni yhty mieleviä, kudai vois sellittiä uskovellien keskenäzet riijat?6Velligo vellenke suudihes da vie uskomattomien ies!
7Jo segi, gu työ suudittokseh keskenäh, on teile menetys. Eigo parembi olis tirpua viäryöt? Eigo parembi olis jiähä kiškotukse?8A työ iče luajitto viärytty da kiškotto muil, kai omil uskovellilgi.9Ettogo tiijä, gu viäryöl eläjät ei suaha kodivuittii Jumalan valdukunnas? Älgiä muaniettokseh! Ni karguajat, ni valehjumaloile kumardelijat, ni vierahan akanke maguajat, ni miehenke maguajat miehet,10ni vargahat, ni ahnahat, ni juomarit, ni koirijat da kiškojat ei suaha kodivuittii Jumalan valdukunnas.11Moizinnu erähät teis oldih enne, no nygöi teidy on pesty puhtahakse da jiäksitty Jumalale, i työ rodiittokseh oigiet Ižändän Iisusan Hristosan nimes da Jumalan Hengen väil.
12«Minul on valdu kaikkeh», no ei kai ole minule hyväkse. «Minul on valdu kaikkeh», no nimille ei pie andua valdua ičen piäl.13Syömizet ollah vaččah niškoi, vačču - syömizih niškoi, vai Jumal hävittäy sen dai tämän. No rungu ei ole karguandah niškoi, a on Ižändäh niškoi, i Ižändy - rungah niškoi.14Jumal nostatti kuollielois Ižändän i omal väil nostattau meidygi.15Ettogo tiijä, gu teijän rungat ollah Hristosan rungan palazet? Ottazingo sit Hristosan rungan palazet da yhtyttäzin karguajan rungah? Nikonzu!16Tiijättöhäi, ken yhtyy karguajah, roih hänenke yksi rungu. Onhäi sanottu: «Nämä kaksi roijah yhtekse rungakse.»17No ken yhtyy Ižändäh, on yksi hengi Hänenke.18Vältelkiättökseh karguandua. Kai muut riähkät, kudamii luadiu ristikanzu, ollah hänen rungan ulgopuolel, no karguaju luadiu riähkiä omua rungua vastah.19Vai etto työ tiijä sidä, gu teijän rungu on teis olijan Pyhän Hengen kodi? Tämän Pyhän Hengen on andanuh teile Jumal. Työ etto ole ičele ižändät,20sendäh gu Jumal osti teidy tävves hinnas. Eläkkiä sit omas rungas muga, gu Jumal rodies ylendetty!
Глава 6