Выбрать язык
Книги Ветхого Завета
Книги Нового Завета
с русским текстом1Jogahizel pidäy heittyö mei- jän piäl olijoin valloin alle. Ei ole valdua, kudai ei tullus Jumalaspäi, kai mual olijat vallat ollah Jumalan pannuot.2Sendäh, ken vastustau valdoi, se nouzou Jumalan käskyy vastah, i ken luadiu muga, suau Jumalan suvvon.3Ken luadiu hyvin, sil ei pie varata vallanpidäjii, varata pidäy sil, kudai luadiu pahoi. Gu tahtonet eliä varuamattah valdua, luaji hyvin, i se sinuu kiittäy.4Valdu on Jumalan käskyläine, se ruadau sinun hyväkse. No ku luadinet pahoi, sit varua! Eihäi valdu tyhjäh kandele miekkua. Se on Jumalan käskyläine, kudaman kauti tazuandu tulou pahanluadijan piäle.5Sendäh pidäy heittyö valloile, ei vai tazuandan täh, a oman hengen täh.6Sendäh työ nalougoigi maksatto, vallathäi sluužitah Jumalale, konzu ruatah omua ruaduo.7Annakkua sit jogahizele se, mi hänele kuuluu: kelle pidäy nalougat, sille anduat nalougat, kelle maksut - sille maksut, kelle varavo - sille varavo, kelle kunnivo - sille kunnivo.
8Älgiä olgua vellas nikelle nimil, vaiku toine toizen suvaičendal. Ken suvaiččou tostu, se on täyttänyh Zakonan käskyt.9Nämä käskyt «Älä magua vierahan akanke», «Älä tapa», «Älä varrasta», «Älä tahto nimidä vierastu» da kai muut käskyt ollah täs sanas: «Suvaiče lähimästy kui omua iččie.»10Suvaičus ei luaji nimidä pahua lähimäzele. Sendäh, ken suvaiččou, se täyttäy kai Zakonan käskyt.
11Paiči sidä työ tiijättö, mi aigoi nygöi on. Tuli aigu teil havaččuo unes, sendäh gu piäzendy on nygöi lähembi meih migu silloi, konzu myö rubeimmo uskomah.12Yö on loppumas, huondes jo valgenou. Hylläkkiämmö sit pimien ruavot da sellikkiämmö valgien puolistajikse.13Eläkkiämmö čestil, kui päiväl eletäh, ei piruijen da humaloijen, ei vierahas postelis da vällil veriälöil, ei riijellen da ei kadehtijen.14Šuorikkuattokseh Ižändäh Iisussah Hristossah, i huoldu omah rungah näh älgiä muutakkua sen himoloin täyttämizekse.
Глава 13