Выбрать язык
Книги Ветхого Завета
Книги Нового Завета
с русским текстом1Vellet, minä kaikel sydämel tahton da molimmos Jumalale, gu Izrail'u suas piäzendän.2Sanon toven: heijän hengi palau Jumalah, no heil ei ole ellendysty.3Hyö ei heitytty Jumalan oigieh, sendäh gu ei ellendetä sidä, a opitah azettua oma oigei.4Hristoshäi on Zakonan loppu, i muga oigiekse rodieu jogahine, ken uskou.
5Sit oigies, kudai tulou Zakonan noudamizes, Moisei kirjuttau: «Ken luadiu, kui käsköy Zakon, se suau sit elaijan.»6A oigei, kudai tulou uskon kauti, sanou nenga: «Älä sano omas sydämes: 'Kenbo nouzou taivahah?'» - se on gu tuvva Hristossua muale -7libo: «Kenbo heittyy pohjattomah haudah?» - se on gu nostattua Hristossua kuollielois.8Ga midäbo sit?
- Sana on lähäl sinuu, sinun suus da sinun sydämes.
Se on se uskon sana, kudamua myö sanelemmo.9Gu sinä suul sanot Iisussua Ižändäkse da sydämel uskot, Jumal nostatti Händy kuollielois, sit sinä piäzet.10Sydämen usko luadiu ristikanzan oigiekse, suun sana tuou piäzendän.11Pyhis Kirjutuksis sanotah: «Ni yksi, ken uskou Häneh, ei puutu huigieh.»12Jevreit da gretsieläzet ei erota toine toizes. Kaikil on yksi Ižändy, i Häi andau tävvel käil kaikile, ken kuččuu Händy abuh.13Onhäi Pyhis Kirjutuksis sanottu: «Jogahine, ken kuččuu abuh Ižändän nimie, piäzöy.»
14No kuibo hyö kirrutah abuh sidä, kudamah ei uskota? Kuibo uskotah sih, kudamas ni kuultu ei? Kuibo kuultah, gu niken ei sanele?15Kuibo sanellah, gu nikedä ei ole työtty sanelemah? Onhäi Pyhis Kirjutuksis sanottu: «Kui ihaskoittau kuulta jevangelien tuojan askelet!»16No ei kaikin kuunneltu jevangeliedu. Isaijahäi sanou: «Ižändy, ken uskoi meijän sanoih?»17Usko rodieu kuulemizes, a kuulemine - Hristosan sanas.18Nygöi kyzyn: Eigo hyö sit kuultu? Tiettäväine, kuultih:
- Viestintuojien iäni kajizi kaikkiel muailmas, heijän sanat lennettih muan agjah.
19Vie kyzyn: eigo Izrail'u ellendännyh? Ellendi! Jumalhäi jo Moisein kauti sanoi heile:
- Minä kuhkutan teidy kadehtimah rahvastu, kudai ei ole tozi rahvas, nostan teis vihan ellendämättömän rahvahan piäle.
20Isaijan kniigas on sanottu vie julgiembah:
- Minuu löyttih net, kudamat ei ečitty Minuu,
Minä avain ičen niilöile, kudamat ei kyzytty Minuu.
21A Izrail'ale oli sanottu: «Pädevän päivän Minä oijendelin käzii omanenäzeh da kuundelemattomah rahvahah päi.»
Глава 10