Выбрать язык
Книги Ветхого Завета
Книги Нового Завета
с русским текстом1Ga sit jo ei suudita häviendäh nii- löi, ket eletäh Hristosas Iisusas [, i ei eletä riähkähizen oman ičen mugah, a Hengen mugah].2Vet Hengen zakon, kudai andau elaijan Hristosas Iisusas, on piästänyh sinuu riähkän da kuolendan zakonas.3Jumal luadii sen, midä Zakon ei voinnuh luadie, se oli väitöi ristikanzan riähkähizen tavan periä. Rahvahan riähkien täh Häi työndi tänne oman Poijan riähkähizen ristikanzan moizennu. Nenga Häi suudii ristikanzas rahvahan riähkät,4gu meis, kudamat elämmö Hengen, a ei riähkähizen oman ičen mugah, rodies tovekse Zakonan mugaine oigei.5Ken eläy riähkähizen oman ičen mugah, sil on sen mugazet tahtot, Hengen mugah eläjil tahtot ollah Hengen mugazet.6Riähkähizen oman ičen tahtot tuvvah surmu, Hengen tahtot - elaigu da rauhu.7Riähkähizen oman ičen tahtot nostah Jumalua vastah, sendäh gu net ei heitytä Jumalan Zakonale da ni voija ei heittyö.8Net, kudamat eletäh riähkähizen oman ičen mugah, ei voija olla mieldy myö Jumalale.
9No työ etto ole riähkähizen oman ičen vallas, a oletto Hengen vallas, gu kerran teis eläy Jumalan Hengi. No se, kel ei ole Hristosan Hengie, ei ole Hänen oma.10Kerran Hristos on teis, teijän rungu on kuolluh riähkän täh, no hengi eläy, sendäh gu rodiittokseh oigiekse.11I gu teis on Jumalan Hengi, Hänen, kudai nostatti Iisussua kuollielois, sit se, kudai nostatti Iisussua kuollielois, luadiu eläväkse teijängi kuolijan rungan teis olijan Hengen väil.
12Sendäh, vellet, myö olemmo vellas, no ei riähkähizele omale ičele, gu eliä sen tahtoloi myö.13Gu elänettö riähkähizen oman ičen mugah, työ kuoletto, no gu Hengen avul kuoletannetto rungan riähkähizet ruavot, sit voitto eliä.14Kaikin, kedä Jumalan Hengi vedäy, ollah Jumalan lapset.15Työ etto suannuh hengie, kudai luadiu teidy orjakse, gu ielleh eläzittö varavon vallas, a saitto Hengen, kudai luadii teidy Jumalan lapsikse. Sit Henges myö kirrummo: «Avva, Tuatto!»16Se Hengi iče yhtes meijän hengenke tovestau, gu myö olemmo Jumalan lapset.17No ku olemmo lapset, sit olemmo i kodivuitin suajat, Jumal andau meile kodivuitin yhtes Hristosanke. Gu kerran yhtes Hristosanke näimmö gor'ua, sit taivahallizeh valgiehgi piäzemmö yhtes Hänenke.
18Minä tulin täh mieleh: nygözen aijan gor'at ollah tyhjät sen tulien taivahallizen valgien rinnal, kudai avavuu meile.19Kai Jumalan luajittu ylen äijäl vuottau Jumalan lapsien jiävindiä.20Kačo gu kaikel Jumalan luajitul pidi heittyö tyhjäkse, ei omal himol, a Sen tahton mugah, kudai muga pani. No kai Jumalan luajittu nad'eičeh,21gu segi piäzöy kaduomizen vallas, Jumalan lapsien jytyi välläle da taivahallizeh valgieh.22Myö tiijämmö, kogo Jumalan luajittu muailmu täh suate ohkau da muokkuahes suandutuskis,23i ei vai se, a myögi, kudamat enzilahjannu saimmo Hengen, ohkammo vuottajes Jumalan lapsekse piäzendiä - meijän rungan piäständiä välläle.24Tämän nad'oužanke myö olemmo piässyöt. No nad'oužu sih, kudaman näit jo täyttynyönny, ei enämbiä ole nad'oužu. Ken valvattau sidä, min jo sai!25No konzu valvatammo sidä, midä emmo näi, myö vuotammo sidä tirpajen.
26Hengi sežo avvuttau meidy, kudamat olemmo vähävägizet. Myö emmo tiijä, mis tuači da kui pidäy moliekseh. No Hengi iče pokoroičeh meis tuači sanattomil hengähtyksil.27I Jumal, kudai tiijustau rahvahan sydämet, tiedäy, midä Hengi tahtou, gu Hengi pokoroičeh Jumalan tahton mugah uskojien puoles.
28Myö tiijämmö, kai rodieu hyväkse niilöile, kudamat suvaijah Jumalua da kudamii Häi kučui, kui oli ielpäi kaččonuh.29Niilöile, kudamii Häi ielpäi valličči, Häi jo ielpäi lepii, gu hyö roittas Hänen Poijan moizekse, gu Hänen Poigu olis enzimäine suures velleksien joukos.30Niilöi, kedä Häi sih lepii, Häi i kučui, a kedä Häi kučui, niilöi luadii oigiekse, a kedä Häi luadii oigiekse, niilöile andoi taivahallizen valgien.
31Midä täh sanommo? Gu Jumal on meijän puoleh, kenbo voibi olla meidy vastah? Niken!32Gu Häi ei žiälöinnyh ni omua Poigua, a andoi Händy kuolemah meis kaikis tuači, kuibo Häi sit Poijanke ei andas meile kaikkie muudugi?33Kenbo voibi viärittiä Jumalan vallittuloi? Vai Jumal. No Häi luadii meidy oigiekse.34Ken voibi suudie häviendäh? Vai Hristos Iisus! No Häi kuoli, Händy i nostatettih kuollielois, i nygöi Häi on Jumalan oigiel puolel da molihes meis tuači!35Mi voibi eroittua meidy Hristosan suvaičukses? Tusku vai ahtistus, painandu vai n'älgy, vai alastomus, varattavat kohtat vai miekku?36Pyhis Kirjutuksis on sanottu:
- Sinun täh meidy tapetah kaiken aijan, pietäh gu iškiettävänny lambahannu.
37No kaikis nämis ahtistuksis meile andau tävven piäzendän Häi, kudai meidy suvaiččou.38Lujah uskon: ni surmu, ni elaigu, ni anhelit, ni muut hengivallat, ni mi nygöine, ni mi tulii, nimittumat väit,39ni korgevus, ni syvys, ni mi muu luajittu ei voi eroittua meidy Jumalan suvaičukses, kudai tuli nägevih Hristosas Iisusas, meijän Ižändäs.
Глава 8