Выбрать язык
Книги Ветхого Завета
Книги Нового Завета
с русским текстом1Minä Puavil, Hristosan Iisusan käskyläine, apostolakse kučuttu da vallittu sanelemah Jumalan jevangeliedu, työnnän tervehytty teile kaikile.
2Jevangelii, kudaman Jumal jo ielpäi uskaldi Pyhis Kirjutuksis omien iänenkandajien kauti,3on sana Hänen Poigah näh. Roindua myö Häi oli Davidan roduu;4pyhyön hengie myö Häi kuollielois nostes jiäviihes Jumalan Poijannu, kudamal on valdu. Häi on Iisus Hristos, meijän Ižändy,5Hänespäi minä sain armon da apostolan sijan, gu vediä kaikkii Jumalua tundemattomii rahvahii uskomah Häneh da heittymäh Hänele Hänen nimen kunnivokse.6Heijän keskes oletto työgi, kudamii on kučuttu kuulumah Iisusale Hristosale.7Armuo da rauhuttu Jumalas, meijän Tuataspäi, da Ižändäs Iisusas Hristosaspäi teile kaikile Riimas olijoile Jumalan armahile, kudamii on kučuttu roimah pyhäkse rahvahakse!
8Enzimäzikse kiitän Iisusan Hristosan nimes minun Jumalua kaikis teis, sikse gu teijän uskoh näh sanellah kaikkiel muailmas.9Jumal, kudamale sluužin kaikel sydämel, gu sanelen jevangeliedu Hänen Poigah näh, nägöy, kui minä heittelemättäh mustelen teidy omis malittulois.10Molimmos ainos, gu jälgimäi kuitahto piäzizin teijän luo, gu ollou moine Jumalan valdu.11Ylen äijäl tahtozin nähtä teidy, gu voizin andua teile mintahto Hengespäi tulluon n'eron da sil lujendua teidy,12toizin sanojen: myö dai työ suazimmo kaikin rohkevuttu meijän yhtehizes uskos.13Tahton, gu tiedäzittö, vellet: äijän kerdua minä huavain tulla teijän luo, no täh suate ainos mitahto azetti minuu. Tahtozin teijängi luo kerätä uudizen, kui keräin sidä toizien rahvahien keskes.14Olen vellas gretsieläzile da varvaroile, tiedäjile dai tiedämättömile,15i sikse tahtozin piästä kuuloittamah jevangeliedu teilegi, Riimas eläjile.
16Minä en huijustai jevangeliedu, se on Jumalan vägi, i se tuou piäzendän kaikes pahas jogahizele, ken sih uskou, enzimäi jevreile, sit gretsieläzelegi.17Jumalan oigei avavuu allus loppuh suate uskon kauti jevangelies. Onhäi Pyhis Kirjutuksis sanottu: «Oigei eläy uskol.»
18Jumalan viha jiävihes taivahaspäi, se tulou kaiken jumalattomuon da viäryön piäle, kudamua luajitah rahvas, kudamat pietäh tozi viäryön vallas.19Sen, midä Jumalas voibi tiediä, hyö voijah nähtä. Jumalhäi jiävii sen heile.20Se, mi on Hänes nägymätöi – Hänen ilmanigäine vägi da jumalus –, muailman luajindua myö on ellendettävis, gu kaččuo Hänen ruadoloi. Sendäh heil ei ole mil puolistua iččie.21Hos hyö tiettih Jumalua, hyö ei kunnivoittu eigo kiitetty Händy Jumalannu, a heijän mielet roittih tyhjänpäiväzikse, i heijän ellendämättömis sydämis rodih pimei.
22Hyö kiistettih, buite ollah mielevät, a iče roittih mielettömäkse.23Kaduomattoman Jumalan taivahalline valgei hyö vaihtettih kaduojien ristikanzoin, linduloin, n'ellijalgazien da vilizijöin kuvih.24Sendäh Jumal hylgäi heidy heijän sydämen himolois paganoih ruadoloih, toine toizenke huiguamah omua rungua.25Jumalan tozi hyö vaihtettih kielahuoh, hyö palvottih luajittuu da sluužittih hänele, a ei Luadijale – ylendetty olgah Häi ilmazen ijän, amin'.26Sikse Jumal jätti heidy huijustettavien himoloin valdah. Naizet vaihtettih luonnolline yhtyndy miehenke luonnonvastazeh,27mugai miehet hyllättih luonnolline yhtyndy naizenke, i heis sytyi himo toine toizeh. Miehet, kudamat ruatah keskenäh huigiedu ruaduo, suajah tämän hairehtundan mugahine tazuandu omas ičes.
28Gu hyö ni huoles ei pietty, kui pidiä Jumalua mieles, Jumal jätti heidy heijän pädemättömien mielien valdah ruadamah sidä, midä ei suas ruadua.29Hyö ollah tävvet kaikenjyttymiä viärytty, pahuttu, ahnehuttu, vihua, kadehuttu, tapanduhimuo, ollah riijačut, muanittelijat, pahantahtojat da kielenkandelijat,30pahanpagizijat, Jumalan vihuajat, vägivaldazet, ylbiet, havizijat, pahan ruavon eččijät, hyö ei kuunnella vahnembii,31hyö ollah ellendämättömät da heih ei sua uskuo, hyö ei suvaija eigo žiälöijä nikedä.32Hyö tietäh Jumalan oigei suudo: ket nenga eletäh, niilöi maksau andua surmale käzih. No yksikai hyö iče ruatah nenga da vie kiitetäh toizii, kudamat muga ruatah.
Глава 1