Выбрать язык
Книги Ветхого Завета
Книги Нового Завета
с русским текстом1I tuli nengoine Ižändän sana Jonale, Amafein poijale:2«Nouze da mene Ninevieh, sih suureh linnah, i sanele sie, gu viestit sen pahois ruadolois tuldih Minussah.»3A Jona nouzi gu pajeta Ižändän silmis Farsisah. Häi tuli Joppieh i löydi sie laivan, kudai oli lähtemäs Farsisah. Jona maksoi d'engat matkas da nouzi laivah, gu mennä Farsisah, iäre Ižändän silmis.
4No Ižändy työndi merele suuren tuulen, i rodih merel ylen suuri bauhu, laivu oli halgiemas.5Merimiehet pöllästyttih, i jogahine rubei molimahes omale jumalale da lykkimäh mereh tavaroi, gu kebjendiä laivu. A Jona heityi laivan sydämeh, vieri sie da vaibui syväh uneh.6I tuli hänen luo laivan vahnin da sanoi hänele: «Midä sinä maguat? Nouze, molei sinun Jumalale! Toinah Jumal mustau meidy, i myö emmo kuole».
7Sit hyö sanottih toine toizele: «Läkkiä, panemmo puikkoh, gu tiijustua kenen täh meijän piäle tuli nengoine pahus”. Hyö pandih puikkoh, i se ozutti Jonah.8Sit hyö sanottih hänele: «Sano meile, kespäi tuli meile tämä pahus. Midä sinä piet ruavonnu da kuspäi tulet sinä? Kus on sinun mua da mittumah rahvahah sinä kuulut?»9Sit häi sanoi heile: «Minä olen jevrei, kunnivoitan Ižändiä, taivahan Jumalua, kudai luadii meren dai kuivan muan».
10Sit miehet varavuttih ylen äijäl da sanottih hänele: «Midä sinä luajiit!» Miehethäi tiijustettih, gu häi on pavos Ižändän silmis, häi ičegi sanoi sen heile.11Hyö sanottih hänele: «Midä luadie sinule, gu meri meile alevus?» Bauhu merel, näit, vai yldyi.12Sit häi sanoi heile: «Ottakkua minuu da lykäkkiä mereh, sit meri alevuu teile, sikse gu minä tiijän sen: minun täh tuli teijän piäle nengoine suuri bauhu».
13No miehet ruvettih ylen äijäl soudamah, gu piästä kovale muale, no ei voidu piästä, sikse gu meri iellehgi bauhai heidy vastah.14Sit kirruttih hyö abuh Ižändiä da sanottih: «Avvuta, Ižändy, älä anna meile kuolta tämän ristikanzan hengen täh, älä luaji meidy viäräkse oigieh vereh! Sinähäi, Ižändy, luajiit, kui pidi Sinule!»15Hyö otettih Jonua da lykättih händy mereh, i meri aleitti oman tavan.16I miehet ruvettih ylen äijäl varuamah Ižändiä i tuodih Hänele verhu da jiäksittihes.
Глава 1