1 Nenga sanou Ižändy: – Kus on teijän muaman erobumuagu, kudual Minä ajanuzin teijän muaman iäre? Vai möingo Minä teidy kelle velgoin eččijäle? Ei, teidy myödih teijän riähkien täh, a teijän muamua työttih iäre teijän pahoin ruadoloin täh. 2 Mikse ei nägynyh nikedä, konzu Minä tulin? Mikse konzu kučuin niken ei vastannuh? Ongo Minun käzi liijan lyhyt, gu piästiä teidy, vai ei ole vägie piästiä? Kačo, Minä käskyl kuivuan meren, jovet muutan tyhjäkse muakse, kalat niis hapatah vienvähyös, kuoltah juomanjanoh. 3 Minä katan taivahan pimiel, huavopaltinal sen salbuan.
4 Ižändy Jumal andoi Minule viizahien kielen, gu Minä voizin sanal lujendua vaivunuttu. Joga huondes Häi nostattau Minuu, nostattau Minun korvat kuulemah kui opastui. 5 Ižändy Jumal avai Minun korvat, i Minä kuundelin, en väistynyh ruavos. 6 Minä annoin oman sellän lyödäväkse da parran nyhtittäväkse, en peittänyh silmii kiruondas da sylgiendäs. 7 Ižändy Jumal avvuttau Minule, sikse en varua huigiedu, sikse kovendin omat rožat tulikiven jyttymäkse. Minä tiijän, Minä en jiä huigieh. 8 Lähäl on Häi, kudai ozuttau Minun oigevuon. Ken tahtou Minuu viärittiä? Anna seizommo yhtes suvvon ies! Ken tahtou suudiekseh Minunke? Anna tulou Minulluo! 9 Kačo, Ižändy Jumal avvuttau minule. Ken suudiu Minuu? Hyö kaikin hävitäh kui soba, koi syöy heidy.
10 Ken teis varuau Ižändiä da kuulou Hänen Sluužijan sanan? Ken kävelöy pimies valgiettah, anna uskou Ižändän nimeh da nadeičeh omah Jumalah. 11 A kaikin työ, ket sytytättö tulen palamah, työ, kuduat ammutto tulipiilii, mengiä iče sih omah tuleh da piilih, kuduat hiilutitto! Se lähtöy Minun käis teile, tuskis työ virutto.
с русским текстом