Выбрать язык
Книги Ветхого Завета
Книги Нового Завета
с русским текстом1 Tämä tapahtui tsuari Jezekien n՚elländeltostu valduvuvvel. Assirien tsuari Sennahirim lähti toruamah Juudien lujendettuloi linnoi vastah da valdai net.2 Lahisas olles häi työndi ylimäzen viinanvalajan suuren torajoukonke tsuari Jezekielluo Jerusalimah vedämäh viestii. Se azetui Ylälammin kanuavan rinnale, Pezendykohtan dorogalluo.3 Hänellyö tuldih dvorčan piämies Eliakim, Helkien poigu, kirjuri Sevna da Joah, Asafan poigu, tsuarin sekretari.
4 Ylimäine viinanvalai sanoi heile:
«Sanokkua Jezekiele: Suuri tsuari, Assirien tsuari, sanou nenga: Mi on se sinun usko, kuduah sinä uskot?5 Minä smietin, net ollah vai tyhjät sanat, a voinale pidäy nevvo da vägi. Keh nygöi sinä nadeičetos, gu ruohtit nosta minuu vastah?6 Sinä, tiettäväine, uskot Jegiptah, sih katkiejah kazl՚an korteheh! Ken sih nojevuu, se pystäy läbi sen käin. Moine on faraon, Jegiptan tsuari, kaikkii vaste, ket luotetah häneh.7 A gu sanonet minule: ‘Myö uskommo Ižändäh, meijän Jumalah’? Sihgo, kuduan mättähii da altariloi hävitti Jezekii da sanoi Juudale da Jerusalimale: ‘Vai tämän altarin ies kumarduattokseh’?
8 Muga, opis luadie liitto minun ižändän, Assirien tsuarinke. Minä annan sinule kaksi tuhattu hebuo. Voitgo löydiä niile raččumiehii?9 I kuibo sit voizit sinä ajua herrua, yhty pienimisgi minun ižändän orjis? Sinä luotat Jegiptah, sen kärrylöih da heboloih.10 Vai smietitgo minä Ižändän käskyttäh tulin tälle muale, gu hävittiä se? Ižändy sanoi minule: ‘Mene sih muah da hävitä se’.»
11 Eliakim, Sevna da Joah sanottih ylimäzele viinanvalajale: «Pagize omien käskyläzienke aramein kielel, sidä myö ellendämmö. Älä pagize meijänke juudan kielel, gu ei kuultas rahvas, kuduat ollah linnan seinil».
12 Ylimäine viinanvalai vastai:
«Smietitgo vai sinun ižändällyö da sinulluo työndi minuu minun ižändy nämien sanoinke? Ei, häi työndi minuu nämien rahvahielluogi, kuduat istutah seinäl da terväh yhtes teijänke ruvetah syömäh omii ullostuksii da juomah omua kustu».
13 Sit nouzi ylimäine viinanvalai da sanoi suurel iänel juudan kielel:
«Kuunnelkua suuren tsuarin sanua, Assirien tsuarin sanua!14 Nenga sanou tsuari: Anna ei muanittele teidy Jezekii, häi ei voi piästiä teidy.15 Älgiä andakkua Jezekiele muanitella teidy Ižändäl, buito Ižändy piästäy teidy i tämä linnu ei puutu Assirien tsuarile käzih.16 Älgiä kuunnelkua Jezekiedy! Nenga sanou Assirien tsuari: Luadikkua sobu minunke, tulgua minulluo, i sit jogahine syöy omas viinumuarjusavus da oman smokvupuun andimii, juou vetty omas kaivos,17 kuni minä en tule da en vie teidy muah, kudai on tämän muan jyttyine, leivän da viinan muah, viinumuarjusaduloin da uudizen muah.18 Älgiä andakkua Jezekiele muanittua teidy sanoil: ‘Ižändy piästäy meidy’. Piästettihgo rahvahan jumalat heijän muan Assirien tsuarin käzis?19 Kus ollah Emafan da Arpadan jumalat? Kus Separvaiman jumalat? Piästettihgo hyö Samarien minun käzis?20 Kudai nämien mualoin kaikis jumalois pellasti oman muan minun käzis? Ga jokse sit Ižändy piästäy Jerusaliman minun käzis?»
21 No hyö oldih vaikkani, ei vastattu hänele ni sanua, sikse gu moine oli tsuarin käsky ei vastata.
22 Eliakim, Helkinan poigu, dvorčan piällikkö, Sevna, kirjuri, da Joah, Asafan poigu, tsuarin sekretari, revitettih omat sovat, tuldih Jezekielluo da sanottih hänele, midä sanoi ylimäine viinanvalai.
Глава 36