1 Rahvas, tulgua kuundelemah, kuulkua, kanzukunnat! Anna kuulou mua dai kai, midä on mual, muailmu dai kai midä se kazvattau! 2 Ižändän viha nouzi kaikkii rahvahii vastah, taba kaikkih heijän torajoukkoloih. Häi jätti heidy häviendäh, andoi tapettavakse. 3 Heijän kuolluot lykätäh kaikkiele, hirvei kuaru nouzou heis, mäit ollah märrät heijän veren valdua. 4 Hävitäh kai taivahan väit, taivas kiärihes turuh, i kai tiähtet pakutah muah, kui viinumuarjutuhjos pakutah lehtet, libo ruohkat muarjat smokvupuus.
5 Kylläl joi Minun miekku taivahas, kačo nygöi se heittyy Edomale da sen rahvahan piäle, kuduan Minä suudiin häviemäh. 6 Ižändän miekku on kai veres, sit tippuu razvu, valuu vuonoin da kozien veri da boššiloin počkurazvu, sikse gu Ižändäl on verhupruazniekku Vosoras da suuri žiivatoiniškendy Edomas. 7 Sie sorrutah diikoit häkit toizienke dai vazat yhtes häkkilöinke. Mua juou kylläl verdy, muan pöly kastuu razvas. 8 Tämä on Ižändän tazuandupäivy, tazuanduvuozi Sionan täh. 9 Edoman jovet muututah tervakse, a mua – rikikse, i rodieu kai mua gu palai tervu. 10 Se ei sammu ni päiväl, ni yöl, ainos rubieu nouzemah savvu. Mua jiäy tyhjäkse rovus roduh, ilmazes ijäs niken ei astu sie. 11 Sie ruvetah elämäh hyybiet da nieglikot, huuhkailinnut da varoit ruvetah elämäh niis. Ižändy vedäy nuoran, luadiu aijan da pystyttäy sinne hävityksen da tyhjyön.
12 Ei sie rodei nikedä ylimystyö, kedä vois panna tsuarikse, hävitäh kai kniäzit. 13 Sen dvorčat upotah piidoituhjoloih, šiiloin da virnuheinien keskeh. Sie ruvetah elämäh šakualat da strausat. 14 Tyhjän muan zvierit kerävytäh yhteh meččykaziloinke i karut kirrutah toine tostu. Sie huogavuu karu, löydäy ičele rauhuon. 15 Sie pezoittuu lendäi paha mado. Se muniu jäičät da luadiu poigii, keriäy niidy ičes ymbäri. Haukat lennetäh toine toizelluo.
16 Eččikkiä da lugekkua Ižändän kniigas: ni yksi nämis ei unohta tulla, eigo net vaihtuta, sikse gu Iče Häi käski, Hänen hengi keriäy net. 17 Iče Häi pani puikkoh heijän elaijan, iče miäräi heile ozan. Ilmazen ijän hyö roijah tiä ižändänny, rodu rovule jälles ruvetah elämäh sie.
с русским текстом