Библия
Выбрать язык
Книги Ветхого Завета
Книги Нового Завета
с русским текстом
SANANKANDAI ISAIJAN KNIIGU
Lugu 15
1 Ennustussana Moavas.
Nenga rodieu: Yöl rodieu levitetty da hävitetty Ar-Moav.
Nenga rodieu: Yöl rodieu levitetty da hävitetty Kir-Moav!
2 Itkemäh pyhile mättähile
nostah Baitan da Divonan eläjät,
Moav itköy Nevos da Medevas.
Kaikil heil on pal՚l՚ahakse ajettu piä,
kaikil leikattu parrat.
3 Pihoil rahvas piikoiribulois,
levoloil da augivoloil
kaikin itkietäh,
kaikin kyynälis.
4 Ulvotah Esevon da Eleala,
heijän iäni kuuluu Jaatsah.
Heile jälles itkietäh Moavan toramiehet,
heijän rohkevus hylgäi heidy.
5 Minun syväin itköy Moavua,
kaikin pajetah siepäi Sigorah, Eglat Selisijah sah,
nostah itkunke Luhitale,
Horonaiman dorogal nostetah suuri itkuiäni.
6 Nimriman viet loppiettihes,
niityt kuivettih, heiny paloi,
ei jiännyh vihandua.
7 Sikse hyö kannetah kai,
midä on heil jällel, midä hyö suitettih,
Aravien joven tuakse.
8 Voiveroitus kuuluu kaikkiel Moavan rajoi myö,
itku kuuluu Eglaimassah,
Beer-Elimassah kuuluu itku.
9 Dimonan viet täytyttih verel,
a Minä työnnän Dimonale vie uvven pahuon:
leijonoi työnnän Moavas pajennuzile piäle,
da niile piäle, ket jiädih muah.
Глава 15
