1 Sana Juudas da Jerusalimas. Isaijan, Amosan poijan, nägy.
2 I sit jälgipäivil rodieu: Ižändän koin mägi rodieu piälimäzekse, se rodieu korgiembakse muidu, i kai rahvas astutah sinne. 3 Äijät rahvas lähtietäh sinne i sanotah: Tulgua, nouzemmo Ižändän mäile, Juakoin Jumalan kodih! Sit Häi opastau meidy kävelemäh Hänen dorogoi myö, myö rubiemmo noudamah Hänen matkua, sikse gu Sionaspäi tulou Hänen zakon, i Jerusalimaspäi kuuluu Ižändän sana.
4 Häi rubieu suudimah rahvahii i viärittäy äijii. Sit miekat tavotah adran terikse, a keijähät – širpilöikse. Sit rahvas ei nosta miekkua toštu rahvastu vastah, rahvas ei opastuta enämbiä toruamah.
5 Oi Juakoin rodu! Tulgua, kävelemmö Ižändän valgies.
6 No Sinä, Ižändy, hylgäit oman rahvahan, Juakoin taloin, sikse gu hyö äijän opastuttih päivännouzupuolen rahvahis. Heil ollah tiedoiniekat kui filistiläzil, hyö kävväh vierasmualazielluo. 7 Heijän mua on täyzi kuldua da hobjua, niidy on piäle miärän. Heijän mua on täyzi hebuo, kärrylöile ei nävy agjua. 8 Heijän mua on täyzi tyhjii jumalankuvii, hyö kumardellahes omil käzil luajittuloile, omien sormien ruadoloile. 9 I muga painuu ristikanzu, i mies alendau iččie – Sinä et prosti heidy.
10 Pajekkua kivimäin sydämeh, peittykkiä muah Ižändän varavos da Hänen suuruon kunnivos. 11 Painutah muah ristikanzan ylbiet silmät, ristikanzan ylbevys alenou, yksi Ižändy rodieu korgei sinä päivänny. 12 Sikse gu tulou Vägilöin Ižändän päivy kaikkie ylbiedy da korgiedu vastah i kaikkie korgiele nostettuu vastah, i se rodieu alendettu. 13 Se išköy kaikkih Livanan kedroih, kuduat ollah korgiet da ylembä kaikkii nossuot, kaikkih Vasanan tammiloih, 14 kaikkih korgieloih mägilöih da kaikkih korgiembih mättähih, 15 kaikkih korgieloih bašn՚oih da kaikkih lujih seinih. 16 Se išköy Farsisan laivoih da kaikkih heijän suvaittavih čomenduksih.
17 Sit langieu ristikanzan suurus, ristikanzas tulluh rodieu alendettu. Yksi Ižändy rodieu korgei sinä päivänny. 18 Sit jumalankuvat hävitäh kogonah. 19 Rahvas pajetah kallivokololoih da muan syvyöh Ižändän varavos da Hänen suures kunnivos, konzu Häi nouzou säräittämäh muadu. 20 Sinä päivänny ristikanzu lykkiäy mygrylöile da yöliivoloile kuldazet da hobjazet jumaloin kuvat, kuduat luadii ičele gu kumardellakseh niile. 21 Iče menöy kallivokoloh da mäin ragoh Ižändän varavos da Hänen suures kunnivos, konzu Häi nouzou säräittämäh muadu. 22 Heittäkkiä uskondu ristikanzah, kudual elaijan hengähtys on vai nenähuogaimis. Mibo häi on?
с русским текстом