Библия
Выбрать язык
Книги Ветхого Завета
Книги Нового Завета
с русским текстом
SOLOMONAN SANANPOLVIEN KNIIGU
Lugu 2
Mielevys vardoiččou pahas
1Poigu, gu ottanet vardeh minun sanat,
pidänet mieles minun käskyt,
2muga gu herkistät korvat kuulemah mielevytty
da kalduat sydämen ellendämäh,
3gu sinä ruvennet kirgumah tieduo,
iänel kuččumah mielevytty,
4gu ruvennet eččimäh sidä kui hobjua
da löydämäh sidä kui uarrehtu,
5sit sinä ellendät Ižändän varavon
da tunnustat Jumalan.
6Sikse gu Ižändy andau mielen,
Hänen suus lähtöy tiedo da mielevys.
7Oigeimielizile Häi pidäy tagan piäzendän,
Häi on suojusraudu oigiel dorogal kävelijöile.
8Häi vardoiččou oigiedu dorogua,
Häi kaččou Omien pyhien matkua.
9Sit sinä ellendät toven dai oigien suvvon,
oigevuon dai kaiken hyvyön dorogan.
10Konzu mielevys tulou sinun sydämeh
da tiedo rodieu hyväkse sinun hengele,
11sit ellendys rubieu vardoiččemah sinuu,
mielenpiendy rubieu kaččomah sinuu,
12gu pellastua sinuu pahas dorogas,
kielahas ristikanzas,
13niis, kuduat hyllätäh oigiet tropat,
gu kävellä pimielöi dorogoi myö,
14kuduat ihastellahes pahua luadihuu,
hyväkse mennäh pahal ruavol,
15kudamien matkat ollah viärät,
kuduat yöksyttih omil dorogoil.
16Pie mieldy, se piästäy sinuu vierahas akas,
kudai sanoil muanittelou sinuu,
17kudai jätti nuorusaijan vastinehen
da unohti omat uskalmot Jumalan ies.
18Hänen kodi vedäy surmah,
hänen dorogat – kalmah.
19Niken hänellyö mennyh ei tule järilleh,
ei lövvä elaijan dorogua.
20Sikse kävele hyvien dorogoil,
pyzy oigieloin jällil,
21sikse gu oigiet ruvetah elämäh mual,
vijattomat pyzytäh sie.
22A jumalattomii hävitetäh muan piäl,
menettäjii kiškotah muas juurineh.
Глава 2
