1Davidan psalmu Ižändäh, muan alustajah näh. Ižändy on Suari! Iloikkahes mua, piettähes iluo kai meren suaret! 2 Pilvi da pimei on Hänes ymbäri, oigei mieli da oigei suudo ollah Hänen valduistuimen alustannu. 3 Hänen ies kulgou tuli, se poltau kai Hänes ymbäri olijat vihaniekat. 4 Hänen tuleniškut vallatah kai muailmu, mua nägöy sen da särizöy. 5 Mäit suletah kui vaha Ižändän ies, kaiken muailman Ižändän ies. 6 Taivahat sanellah Hänen oigieh mieleh näh, i kai muailman rahvas nähtäh Hänen kunnivo. 7 Huijustettahes kaikin, ket kumardetahes kuvile, ket löyhketäh kivijumaloil. Kumardakkuattokseh Hänen ies kai jumalat. 8 Sion kuulou sen da ihastuu, kai Juudan linnat pietäh iluo, gu Sinun suvvot, Ižändy, ollah oigiet. 9 Ižändy, Sinä olet Ylimäine, olet muan piäl ylin, kaikkii jumaloi korgiembi. 10 Työ, ket suvaičetto Ižändiä, vihakkua pahuttu! Häi kaččou da vardoiččou Omii pyhii, piästäy heidy jumalattomien käzis. 11 Päiväine pastau oigeimielizile, ilo tulou niilöile, kenen syväin on puhtas. 12 Pidäkkiä hyviä mieldy Ižändäs, oigeimielizet! Kiittäkkiä Hänen pyhiä nimie!
с русским текстом