1Pajo. Psalmu. Korahilazien mugah. Pajojoukon ohjuajale. Joukol pajatettavakse. Ezrahil՚azen Emanan opastus. 2 Ižändy Jumal, Piästäjäzeni! Päiväl minä kirrun Sinuu abuh, yölgi kiännyn Sinuh päi. 3 Tulgah minun malittu Sinun edeh, kaldua korvu minun kirrundah! 4 Kylläl olen nähnyh gor՚ua, olen tuonilmazen kynnyksel. 5 Olen pandu kalmah menijöin joukkoh. Minä olen kui mies, kudai kaimai omat väit. 6 Olen jiännyh yksin, kui olizin jo kuolluh. Minä virun kui kuolluot ruuhis, kudamii Sinä et enämbiä musta, kudamii Sinun käzi enämbiä ei auta. 7 Sinä panit minuu syväh haudah, pimieh da pohjattomah. 8 Sinun viha jygieh painau minuu, da kaikil Sinun aldoloil Sinä löit minuu. 9 Sinä ajoit loitos minuspäi minun dovarišat, luajiit minuu tylgiekse heile. Olen kiinni, en voi piästä välläle. 10 Tuskis minä itken silmät kuivakse. Kaiken päivän kirrun Sinuu, Ižändy, oijendan käzii Sinuh päi. 11 Ethäi Sinä kuolluzile luaji kummua, eihäi kuolluot nosta kiittämäh Sinuu. 12 Ei ruuhes sanella, kui Sinä armahtat, ei tomus mustella, mittuine uskottavu Sinä olet. 13 Tundietahgo pimies Sinun kummii, paistahgo Sinun hyvyös unohtettuloin muas? 14 Ga minä kirrun Sinuu, Ižändy, aijoi huondeksel minun malittu on Sinun ies. 15 Ižändy, mikse hylgäit minuu, mikse peität silmii minus? 16 Nuoruos suate olen ozatoi, surmu käveli minun rinnal. Väzyndäh suate kannan Sinun annettuu gor՚atakkua. 17 Sinun viha on mennyh minus piäliči, Sinun pöllätykset kuattih minuu. 18 Joga päiviä net ollah ymbäri minus kui viet, tullah minun piäle joga puoles. 19 Sinä ajoit iäres kai minun dovarišat da lähimäzet, tuttaviigi ei nävy.
с русским текстом