Библия
Выбрать язык
Книги Ветхого Завета
Книги Нового Завета
с русским текстом
PSALTIRI
80 Psalmu
1 Pajojoukon ohjuajale. Soitetah gefalazien soittimil. Asafan psalmu.2 Kajahutakkua ilopajo Jumalale!
Häi on meijän lujus.
Huikakkua vessel iäni Juakoin Jumalale!
3 Varustakkua psalmu, ottakkua timpan,
soittakkua heliel liiral da arfal.
4 Puhaldakkua torveh, konzu on uvvenkuun aigu,
konzu on täyzikuu, konzu on meijän pruazniekku!
5 Tämä on miärävys Izrail՚ah näh,
käsky, kuduan Juakoi on suannuh Jumalas.
6 Ižändy andoi sen Josifan heimole Jegiptan muas iäres lähtijes.
Sie kuulin paginua,
kudamua enne en kuulluh:
7 «Minä otin takan sinun hardielois,
sinun käit piästih viršilöis.
8 Sinä kirruit hiäs Minuu, i Minä piästin sinuu.
Minä vastain sinule jyryn aigua, pilvien keskes.
Merivan vezien luo Minä opiin sinun mielii.
9 Kuulkua Minun rahvas, Minä vakustan teidy.
Izrail՚u! Oh, gu sinä kuulizit Minuu!
10 Anna ei rodei sinul tostu jumalua,
älä kumardai vierahale jumalale.
11 Minä olen Ižändy, sinun Jumal,
Minä toin sinun iäres Jegiptan muas.
Avua suu, i Minä täytän sen.
12 Ga Minun rahvas ei kuunneltu Minuu,
Izrail՚u ei heittynyh Minule.
13 Sendäh Minä hylgäin sen,
jätin heidy heijän kovennuon syväimen valdah.
Käveltähes omua mieldy myö.
14 Oh, gu Minun rahvas kuultas Minuu,
gu Izrail՚u kävelis Minun dorogoi myö!
15 Minä terväh alevuttazin heijän vihaniekat,
nostazin käin heijän ahtistajii vastah.
16 Net, ket vihatah Minuu,
painuttas muah Minun ies,
da heijän alendus kestäs ijän.
17 A Omua rahvastu Minä syöttäzin parahal nižul,
valuttazin heile metty kallivospäi».
Глава 80
