Библия
Выбрать язык
Книги Ветхого Завета
Книги Нового Завета
с русским текстом
PSALTIRI
79 Psalmu
1 Pajojoukon ohjuajale. Pajatetah kui «Sovun liilijat». Asafan psalmu.2 Tarkah kuundele meidy, Izrail՚an Paimoi,
Sinä, kudai ohjuat Josifan heimuo
kui paimoi karjua,
Sinä, kuduan istundusijua kannatetah Heruvimat!
Ozuta Iččie Omas kunnivos.
3 Efraiman, Veniaminan da Manassien
heimoloin ies ozuta Sinun vägi,
tule piästämäh meidy.
4 Jumal, auta meidy roija moizekse,
mittumat olimmo enne.
Anna meile nähtä Sinun silmien valgei,
sit myö piäzemmö.
5 Ižändy, Vägilöin Jumal, viego hätken piet vihua,
etgo kuule Oman rahvahan malittuloi?
6 Sinä syötit meidy kyynälleiväl,
juotit meile äijän kyynäldy.
7 Sinä jätit meidy rinnaleläjien hambahih,
meijän vihaniekat niäritetäh meidy.
8 Vägilöin Jumal, auta meidy roija moizekse,
mittumat olimmo enne.
Anna meile nähtä Sinun silmien valgei,
sit myö piäzemmö.
9 Sinä toit Jegiptaspäi viinumarjupuun,
ajoit iäres vierahat rahvahat
da istutit sen heijän sijah.
10 Sinä luajiit sille tilan,
se juurdui sih kazvamah da täytti muan.
11 Sit rodih pilvežy mägilöil,
sen oksat ollah kui Jumalan kedrat.
12 Sen oksat levittih mereh suate,
sen vezat Jefrat-jogeh suate.
13 Mikse Sinä murendit aijat sit ymbäri,
jätit viinumarjat kaikile siiričiastujile riuhtottavakse?
14 Meččypočči jyrziy sidä,
da kai peldoelätit syvväh sidä.
15 Vägilöin Jumal, kiänny järilleh,
kačahtai meih taivahaspäi!
Kačo meidy!
Ota kačottavakse tämä viinumarjupuu.
16 Suojua sidä, kuduan istutit Omal oigiel käil,
taimendu, kuduan kazvatit suurekse Iččes niškoi.
17 Hävittähes Sinun varattavan kačahtuksen al net,
kuduat poltettih se tulel da leikottih sidä.
18 Anna Sinun käzi suojuau Sinun käskylästy,
kudai on Sinus oigiel puolel,
ristikanzan poigua, kuduan kazvatit suurekse Iččes niškoi.
19 Sit myö emmo kieldävy Sinuspäi.
Anna meile eliä,
i myö kirrummo abuh Sinun nimie.
20 Ižändy, Vägilöin Jumal, auta meidy roija
moizekse, mittumat olimmo enne.
Anna meile nähtä Sinun silmien valgei,
i myö piäzemmö.
Глава 79
