Библия
Выбрать язык
Книги Ветхого Завета
Книги Нового Завета
с русским текстом
PSALTIRI
78 Psalmu
1 Asafan psalmu. Jumal, Sinun muah on tuldu toisvierozet rahvahat.
Hyö paganoitettih Sinun pyhäkodi,
luajittih Jerusalimu kiviruoppahakse.
2 Sinun käskyläzien rungat hyö annettih taivahan
linduloile syödäväkse,
Sinun pyhien rungat zvierilöile.
3 Kaikkiel Jerusalimas hyö tapettih heidy,
valutettih heijän verdy kui vetty.
Ei olluh nikedä, ken pannus heidy muah.
4 Rinnaleläjät nagretah meidy,
ymbärieläjät huijatah da kirotah meidy.
5 Kuh suate, Ižändy, vihuat meidy?
Kuh suate Sinun taba palau kui tuli?
6 Kiännä Oma viha muailman rahvahih,
kuduat ei tundieta Sinuu,
valdukundih, kuduat ei kučuta abuh Sinun nimie,
7 gu hyö hävitettih Juakoin rodu,
tyhjendettih sen eländykohtat.
8 Älä viäritä meidy tuattoloin riähkis,
a anna meile kerras nähtä Sinun armo,
gu myö olemmo äijäl vaivatut.
9 Auta meidy, Jumal, meijän Piästäi,
Sinun nimen kunnivon täh!
Piästä meidy da prosti meijän riähkät
Sinun nimen täh!
10 Mikse olis toisvierozil sanuo:
«Kusbo on heijän Jumal?»
Tazua heile!
Anna meile nähtä,
kui Sinä tazuat Omien käskyläzien veres,
kudai hyö valutettih.
11 Kuule kiinniotettuloin voiveroitus,
Omal vägeväl käil piästä kuolendutiel olijat.
12 Seiččiekerdazesti maksa meijän rinnaleläjile
niilöis kiruondusanois,
kudamil hyö kirottih Sinuu, Ižändy.
13 Myö, Sinun rahvas, Sinun niittylöin lambahat,
rubiemmo ijän kiittämäh Sinuu,
polves polveh ylendämäh Sinuu.
Глава 78
