Библия
Выбрать язык
Книги Ветхого Завета
Книги Нового Завета
с русским текстом
PSALTIRI
70 Psalmu
1 Sinuh, Ižändy, minä pien toivuo,
anna nikonzu en muanivu Sinuh.
2 Sinä olet oigeimieline, piästä minuu!
Kiännä korvu minuh päi da auta minuu!
3 Ole minule kallivo,
kuduan suojah voin ainos pajeta,
Sinä, kudai lepiit minule piäzendän.
Sinä olet minun lujus dai varuamatoi olendukohtu.
4 Jumalazeni, piästä minuu jumalattomien käzis,
zakonanrikkojien da vägivaldazien kobris.
5 Ižändy, Jumalazeni, Sinähäi olet minun toivo,
minun suoju nuoris päivis algajen.
6 Minun roindua myö Sinä olit minun tuvennu,
Sinä piästit minuu muaman vačas.
Sinule minä ainos pajatan ylendyspajuo.
7 Äijät kummeksitah minuu,
no Sinä olet minun luja tugi.
8 Sendäh minun suu on täyzi kiitändysanua,
joga päiviä minä ylendän pajol Sinun kunnivuo
da kummanhyvytty.
9 Älä hylgiä minuu minun vahnoil päivil,
älä jätä minuu, konzu minun vägi väzyy.
10 Minun vihaniekat paistah minuu vastah,
hyö peitoči vardoijah minun hengie,
paistah keskenäh
11 da sanotah: «Jumal hylgäi händy.
Ajakkua händy jälles da ottakkua kiinni,
ei ole hänel piästäjiä».
12 Jumal, älä loittone minus!
Jumalazeni, huolita minule abuh!
13 Anna puututah huigieh
da hävitäh minun painajat,
anna kattau huigei da paha sluavu minun ahtistajii.
14 A minä ainos luotan Sinuh
da vie enämbäl kiitän Sinuu.
15 Minä sanelen Sinun oigieh mieleh näh,
joga päiviä Sinun piäständyruadoloih näh,
kudamii ni lugie ei sua.
16 Sanelen Ižändän, Jumalan, suurih ruadoloih näh,
ylendän Sinun oigiedu mieldy, vai Sinun.
17 Jumal, Sinä opastit minuu nuoris päivis algajen,
i tänäpäigi minä sanelen Sinun kummanruadolois.
18 Jumal, älä hylgiä minuu vahnuoh suate,
minun harmuah piäh suate,
kuni en sanele Sinun väis
tälle da kaikile tulijile polvile.
19 Jumal, Sinun oigevus on ylen korgei,
suuret ollah Sinun ruavot.
Jumal, ken on Sinun jyttyine?
20 Sinä toit minule äijän tuskua da ahtistustu,
no sit myös elavutit minun hengen,
toit minuu muan syvyös.
21 Sinä ylendit minuu, Sinä urostit minuu,
toit minuu muan syvyös.
22 Arfan soitol minä kiitän Sinuu,
Sinun oigiedu mieldy, Jumalazeni.
Minä pajatan Sinule liiral soittajen,
Izrail՚an Pyhä.
23 Minun huulis lähtöy iloiäni,
konzu pajatan Sinule.
Minun hengi on täyzi hyviä mieldy,
gu Sinä lunnastit sen.
24 Minun kieli sanelou heittelemättäh
Sinun oigieh mieleh näh.
Huigien da pahan sluavan suadih minun ahtistajat.
Глава 70
