1Pajojoukon ohjuajale. Idifuman mugah. Davidan psalmu. 2 Vai Jumalan ies rauhoittuu minun syväin, Hänes tulou minun piäzendy. 3 Vai Häi on minun kallivo, minun piäzendy, minun puolistai, minä en enämbiä horjahtai. 4 Viego hätken työ rubietto ahtistamah minuu? Teidy kaikkii kuatah kui kallistunnuttu seiniä, kui kuadujua aidua. 5 Hyö duumaijah keskenäh kui sordua minuu muah, hyö rakkahal kielastellah. Suul hyö hyvitetäh, a syväimeči kirotah. 6 Vai Jumalas eči rauhuttu, minun hengi, vai Hänes vuota hyviä! 7 Häi yksi on minun kallivo, minun piäzendy, minun puolistai, sikse en häilähtäi. 8 Jumalas on minun piäzendy dai kunnivo, Häi on minun luja kallivo da suoju. 9 Rahvas, luottakkua ainos Jumalah, Hänen ies avakkua omat syväimet, Jumal on meijän suojusija. 10 Rahvahah on tyhjy uskuo, hyö ollah kielahat. Gu panna heidy viesoile, kaikin yhtes hyö ollah kebjiembät tyhjiä. 11 Smietittö, voitto eliä vägivallan vuoh? Älgiä löyhkäkkiä kiškotul. Konzu eluo liženöy, älgiä andakkua sille syväindy. 12 Jumal sanoi kerran, kaksi kerdua sen kuulin: Jumalan käis on vägi. 13 Sinul, Ižändy, on armo. Sinä maksat jogahizele hänen ruadoloi myö.
с русским текстом