Библия
Выбрать язык
Книги Ветхого Завета
Книги Нового Завета
с русским текстом
PSALTIRI
58 Psalmu
1 Pajojoukon ohjuajale. Pajatetah kui «Älä hävitä». Davidan runo, kuduan häi kirjutti sit, konzu Saul työndi vardoiččijoi hänen koin luo, ku tappua händy.2 Jumalazeni, piästä minuu vihaniekois,
puolista piäletulijis.
3 Piästä minuu pahanluadijois,
piästä tappajis.
4 Hyö vardoijah minun hengie,
vägevät miehet nostah minuu vastah,
hos en ole luadinuh pahua, engo riähkiä, Ižändy.
5 En ole viäry, no yksikai hyö toravehkehienke
tullah minuh käzin.
Kačahtai minuh päi, tule minule abuh!
6 Sinä olet Ižändy, Vägilöin Jumal, Izrail՚an Jumal.
Nouze da mene muailman rahvahien luo,
älä žiälöiče niyhty pahanluadijois.
7 Hyö tullah joga ehtiä,
ulvotah kui koirat da kävelläh linnas ymbäri.
8 Kirovosanat lähtietäh heijän suus,
heijän sanat ollah kui miekat.
Hyö smietitäh: «Kenbo kuulou?»
9 No Sinä, Ižändy, nagrat heidy,
Sinä huiguat kaikkii vierahile jumaloile kumardelijoi.
10 Heil on vägi käis,
no minä tulen Sinun luo, Jumal,
gu Sinä olet minun puolistai.
11 Jumal, minun armahtai, astuu minun ies.
Häi andau minule nähtä,
midä roihes minun vihaniekkoin kel.
12 Älä tapa heidy, ku minun rahvas ei unohtettas,
mittuzet hyö oldih.
Levitä heidy Sinun väil,
paina heidy muah, Ižändy, meijän puolistai.
13 Heijän suus lähtenyh sana on heijän riähky.
Puututtahes hyö ylbevyön ridah
omien kirondoin da kielastandoin täh.
14 Hävitä heidy Omas vihas,
hävitä heidy, ku heidy ei olis enämbiä.
Anna nähtäh: Jumal on Juakoin haldivoiččii,
vallanpidäi muan agjoih suate.
15 Hyö tullah joga ehtiä,
ulvotah kui koirat da kävelläh linnas ymbäri,
16 ečitäh syömisty, da gu ei lövvetä,
ulvotah nälläs yöt läbi.
17 A minä rubien pajattamah Sinun vägeh näh,
aigazes huondekses rubien ylendämäh Sinun armuo,
gu Sinä olet minun puolistai da suoju hädäpäivänny.
18 Jumal, Sinä olet minun vägi,
Sinule minä pajatan.
Sinä olet minun puolistai
da armolline Jumalazeni.
Глава 58
