Библия
Выбрать язык
Книги Ветхого Завета
Книги Нового Завета
с русским текстом
PSALTIRI
57 Psalmu
1 Pajojoukon ohjuajale. Pajatetah kui «Älä hävitä». Davidan runo.2 Ollahgo oigiet teijän suvvot, työ vallanpidäjät?
Oigiehgo työ suuditto ristikanzoi?
3 Etto suudi. Viärytty työ suitatto syväimeh,
a teijän käit luajitah vägivaldua.
4 Muaman kohtus algajen jumalattomat ollah viäril dorogoil,
roindua myöte kielastelijat ollah yöksyksis.
5 Heijän juadu on kui mavon juadu,
hyö typitäh omat korvat,
ollah kui kuurneh mado,
6 kudai ei kuule mavonmuanittajan iändy,
hos kui hyvin häi muanitelkah.
7 Jumal, katko hambahat heijän suus,
Ižändy, murenda nualoin leijonoin leuguluut!
8 Hävittähes hyö kui valui vezi.
Ambujes heijän piilit roittahes kui katkennuot.
9 Kuivettahes kui avavunnuh edenöi,
äldähes nähtähes päivästy kui keskenaigoi suadu lapsi.
10 Jo enne ku teijän padoin al ruvetah palamah piidoioksat,
tuulispyöröi kiškou oksat da täppiäy tulen.
11 Oigeimieline pidäy iluo,
konzu nägöy tazuandan,
häi pezöy omat jallat jumalattomien veres.
12 I rahvas sanotah: «Oigeimieline tottu suau palkan.
Toven on Jumal, kudai suudiu muan piäl».
Глава 57
