Библия
Выбрать язык
Книги Ветхого Завета
Книги Нового Завета
с русским текстом
PSALTIRI
56 Psalmu
1 Pajojoukon ohjuajale. Pajatetah kui «Älä hävitä». Davidan runo, kudaman häi kirjutti, konzu pagei Saulas mägikoloh.2 Armahta minuu, Jumal, armahta minuu!
Sinus minä ečin suojua.
Sinun siibien al minä olen peitos,
kuni ei loputa bauhut.
3 Minä kučun abuh Jumalua, ylimästy Jumalua,
Häi azuu minule hyvyön.
4 Häi työndäy avun taivahaspäi da piästäy minuu,
Häi huiguau sidä, ken tahtou lainota minuu.
Jumal andau Oman armon da toven!
5 Minä olen leijonoin keskes,
minä virun tuldu hengiäjien keskes,
ristikanzoin keskes, kudamil hambahat ollah kui piilit da keijähät,
a kieli on kui terävy miekku.
6 Jumal, nostettahes Sinuu korgiembakse taivahii,
Sinun kunnivo roikkah kaikel mual!
7 Hyö azetettih verko minun tiele,
painettih minun hengi muah.
Hyö kaivettih minule haudu,
no iče pakuttih sinne.
8 Minun syväin on valmis, Jumal,
minun syväin on valmis pajattamah da kiittämäh.
9 Nouze, minun kunnivo,
havaču arfu
*а da liiru!
Minä nouzen aijoi.
10 Rubien ylendämäh Sinuu, Ižändy,
muailman rahvahien keskes,
rubien pajattamah Sinus kiitändypajuo
toisvierozien keskes.
11 Suurihäi on Sinun armo,
se on taivahah suate,
Sinun tozi on pilvih suate.
12 Jumal, nostettahes Sinuu korgiembakse taivahii,
Sinun kunnivo roikkah kaikel mual!
*а 9 56:9 Arfu on lattiel seizoi kielisoitin.
Глава 56
