Библия
Выбрать язык
Книги Ветхого Завета
Книги Нового Завета
с русским текстом
PSALTIRI
55 Psalmu
1 Pajojoukon ohjuajale. Pajatetah kui «Vaikkani olii kyyhköi loittozes muas». Davidan runo, kuduan häi kirjutti, konzu filistiläzet otettih händy kiinni Gefas.2 Jumal, armahta minuu!
Rahvas tahtotah lainota minuu,
joga päiviä tartutah minuh, ahtistetah minuu.
3 Vihaniekat ečitäh minuu joga päiviä,
ku hävittiä minuu.
Ylimäine, äijy on minuh käzin tulijua.
4 Konzu varavo valduau minuu,
minä vuotan Sinus abuu.
5 Minä ylendän Jumalan sanua,
Jumalah hengästelemmös, en varua.
Midä voibi luadie minule ristikanzu?
6 Joga päiviä hyö muutellah minun sanoi.
Ainos heil on mieles luadie minule pahuttu.
7 Hyö kerävytäh yhteh,
peitoči kačotah minun askelii,
ku suaha käzih minun hengi.
8 Tazua heile heijän viäryös!
Jumal, ozuta muailman rahvahile Oma viha,
hävitä heidy.
9 Minun pavosolendupäivät Sinä jo luvit,
keriä minun kyynälet Sinun astieh,
merkiče net Sinun kniigah.
10 Minun vihaniekat juostah pagoh,
konzu minä kučun Sinuu.
Nenga minä tiijustan,
ku Jumal on minun puolel.
11 Jumal, minä ylendän Sinun sanua,
Ižändy, minä kiitän Sinun sanua.
12 Jumalah minä hengästelemmös, en varua.
Midä voibi azuo minule muan ristikanzu?
13 Minä annoin Sinule sanan, Jumal.
Minä pien sen sanan,
annan Sinule kiitändyverhan.
14 Sinähäi piästit minun hengen surmas,
silmät kyynälis,
et andanuh minun jalloile öntästyö,
ku minä voizin kävellä Jumalan ies,
sie kus on elaigu da valgei.
Глава 55
