1Pajojoukon ohjuajale. Kielisoittimil. Davidan opastus. 2 Jumal, kuundele tarkah minun malittuu, älä peity, konzu minä pakičen abuu. 3 Kuundele minuu da vastua minule, minä olen tuskis omien huolien täh. Olen varavon vallas 4 vihaniekkoin kirrundan täh, jumalattomien piinuandan täh. Hyö kuatah minun piäle koitelmuksii, tavas painetah minuu. 5 Syväin särizöy minun ryndähis, kuolendan muokat tullah minun piäle. 6 Varavo säräittäy minun syväindy, pöllästys valdai minuu. 7 Minä sanon: «Andashäi ken minule siivet kui kyyhköil, minä lendäzin iäre, löydäzin kohtan, kus huogavuo. 8 Pagenizin loitos da azettuzin tyhjäh muah, 9 kiirehtäzin peittyö tuules da bauhus». 10 Ižändy, hävitä heijän mielet, sevoita heijän paginat, gu minä näin linnas vägivaldua da riidua. 11 Yöt dai päivät hyö kävelläh linnas ymbäri, sen seinii myö. Viärys da vaivu eletäh sit linnas, 12 hävitys on sen keskel, muanittelendu da kielastus ei jätetä sen pihoi. 13 Gu vihaniekku kiruos minuu, sen minä kestäzin, gu minun vihuaju suurendelizihes minun ies, hänes minä peittyzin. 14 No sinä olet minun jyttyine, minun dovariššu da lähimäine, 15 kuduanke myö pagizimmo kaikes da kävyimmö yhtes Jumalan pyhäkodih. 16 Anna surmu tabuau heidy, anna elävänny puututah tuonilmazih, gu pahus on heijän eländysijas, heijän keskes. 17 Minä kirrun Jumalua, i Häi piästäy minuu. 18 Ehtäl, huondeksel dai keskipäiväl rubien pokoroiččemahes da voiveroittamah, i Häi kuulou minun iänen. 19 Häi piästäy minun hengen rauhah kaikis minun vastustajis, kudamii on äijy. 20 Jumal kuulou minuu da azettau heidy, Häi, kudai ammuzis aijois pidi valdua. Minun vastustajat ei muututa, hyö ei varata Jumalua. 21 Hyö nostettih käzi niilöin piäle, kuduat elettih heijänke rauhas, hyö rikottih sobu. 22 Heijän kielet ollah libiet kui voi, a heijän syväimes on viha, heijän sanat ollah libiet kui siemenvoi, no net ollah terävät kui pal՚l՚astettu miekku. 23 Anna Ižändäle oma huolien takku, i Häi auttau sinuu. Häi nikonzu ei anna sorduo oigiele ristikanzale. 24 Tappajat da muanittelijat ei eletä ni puoldu igiä, Sinä, Jumal, lykkiät heidy syväh haudah. A minä tuvičemmos Sinuh, Ižändy.
с русским текстом