Библия
Выбрать язык
Книги Ветхого Завета
Книги Нового Завета
с русским текстом
PSALTIRI
44 Psalmu
1 Pajojoukon ohjuajale. Pajatetah kui «Liilijat».
Korahilazien opastus. Suvaičendan pajo.2 Minun syväin on täyzi hyviä sanua.
Minä sanelen oman runon suarile,
minun kieli on kui hyvän kirjuttajan käzi.
3 Suari, sinä olet čomin ristikanzan poijis.
Sinun suus lähtietäh sulavat sanat,
sikse Jumal hyvittäy sinuu ilmazenijän.
4 Riputa vyöle miekku, sinä vägevy mies,
selgie kunnivoh da čomuoh.
5 Kaikes omas suuruos nouze torah
toven, hyvyön da oigevuon puoles.
Luadikkah sinun oigei käzi kummanruaduo.
6 Terävät ollah sinun piilit, sinä vägevy,
muailman rahvahat painutah sinun ies,
ei kestetä suarin vihaniekat.
7 Sinun valduistuin on kui Jumalan,
se pyzyy ilmazenijän,
sinun valdukeppi on oigevuon valdukeppi.
8 Sinä suvaičet oigevuttu da vihuat viärytty,
sikse Jumal, sinun Jumal, nosti sinuu
vellien keskes da voideli ilon voidiel.
9 Kai sinun sovat tullah smirnale, aloile da kassiele.
Slonanluudvorčas veseldetäh sinuu.
10 Suariloin tyttäret ollah korgeirovullizien keskes sinus ymbäri,
suarin akku seizou sinun oigiel puolel Ofiran kullas.
11 Kuule, tytär, kuundele minun nevvuo,
unohta oma rahvas da tuatan kodi.
12 Anna syttyy suarin hengi sinun čomuoh,
häi on sinun ižändy.
Kumardai hänele,
13 sinä Tiiran tytär.
Muan elokkahimat myvvitelläh sinuu lahjoin vuoh,
ku sinä kačahtazittos heih.
14 Suarin tyttären kunnivo on hänel syväimes,
hänen sovat on poimittu kullal.
15 Čomis sovis vietetäh händy suarin luo,
hänele jälles vietetäh sinun luo toizii neidizii, hänen podruugoi.
16 Heidy otetah vastah iloiänel,
hyö astutah suarin dvorčah.
17 Sinun tuatan valdusijah, suari, sinun jälles
nostah sinun poijat.
Sinä panet heidy vallanpidäjikse
kaikkie muadu myö.
18 Minä luajin sinun nimen musteltavakse
polves polveh suate.
Muailman rahvahat ruvetah ylendämäh sinuu
ainos da ilmazenijän.
Глава 44
