1Pajojoukon ohjuajale. Davidan psalmu. 2 Lujah minä uskoin Ižändäh, i Häi kumardui minun puoleh da kuuli minun kirrundan. 3 Häi nosti minuu syväs havvas, upottajas suos. Häi nosti minuu kallivole, andoi lujan alustan minun jalloile. 4 Häi pani minun suuh uvven virren, kiitändypajon meijän Jumalale. Äijät kuultah se, i ruvetah varuamah da luottamah Ižändäh. 5 Ozakas on se ristikanzu, kudai eččiy suojua Ižändäs, a ei eči abuu ylbielöis da niilöis, ket kielastuksele sluužitah. 6 Ižändy, Jumalazeni, Sinä olet luadinuh äijän, olet luadinuh kummanruaduo, olet ainos pidänyh meidy mieles. Kedä voibi verrata Sinuh! Minä tahtozin sanella Sinun ruadolois, no niidy on enämbi, migu voin luvetella. 7 Iškiettäviä verhua da syöndyverhua Sinä et tahto, poltoverhua da riähkyverhua Sinä et pakiče, no Sinä annoit minule kuulijat korvat. 8 Sikse sanoin: «Kačo, minä tulen. Kirjuturuh on kirjutettu minus. 9 Jumalazeni, minä rakkahal täytän Sinun tahton, Sinun zakon on minun syväimes». 10 Minä sanelen Sinun oigielois mielilöis jumalankoin suures sluužbas, en piettelei paginas. Ižändy, Sinä sen tiijät! 11 En peitä Sinun oigiedu mieldy omah syväimeh, a sanelen, mittuine uskottavu Sinä olet da kui Sinä avvutat. En peitä Sinun armuo da tovensanoi pruazniekkurahvahaspäi. 12 Ižändy, älä ota minul Sinun armuo! Sinun armo da tozi vardoittahes minuu ainos, 13 gu lugemattomat hiät ollah minus ymbäri, gu riähkät tavattih minuu kampih, sammutettih valgei minun silmis. Niidy on enämbi migu tukkua piäs, minun rohkevus kadoi. 14 Ižändy, ole minule armolline, piästä minuu! Huolita abuh, Ižändy! 15 Roikkah huigei da haskargei kaikile, ket ečitäh surmua minule! Kiännyttähes pagoh da puututtahes nagrettavakse kaikin, ket tahtotah minule pahua! 16 Pöllästyttähes omua ozattomuttu, kuduat sanotah minule: «Kačo, sait!» 17 Kaikin ket ečitäh Sinuu, piettähes hyviä mieldy da nostettahes iloiäni Sinun täh. Ket suvaijah Sinun abuu, sanottahes ainos: «Suuri on Ižändy!» 18 Minä olen köyhy da kurju, no Ižändy pidäy huoldu minus. Jumalazeni, Sinä olet minun abu dai Piästäi. Älä hätkesty!
с русским текстом