1Pajojoukon ohjuajale. Ižändän käskyläzen Davidan psalmu. 2 Riähky pagizou jumalattoman syväimes, ga häi ei enämbiä varua Jumalua. 3 Riähky salbuau hänen silmät, ga häi ei näi omii riähkii, ei vihua omii vigoi. 4 Hänen sanat ollah kielastus da muanitus, häi ei tahto ounastuo, ku luadie hyviä. 5 Muatesgi häi duumaiččou, kui mennä zakonoi vastah. Häi astuu dorogua myöte, kudai ei ole hyvä, eigo häi vältelei pahua. 6 Ižändy, Sinun hyvys on taivahih suate, Sinun tozi pilvih suate. 7 Sinun oigei mieli on Jumalan mägilöin korgevus, Sinun suudo on kui suuri syvys. Ižändy, Sinä kačot da vardoičet ristikanzoi dai elättilöi. 8 Mittuine kallis on Sinun armo, Jumal! Sinun siibien al ristikanzat ollah suojas. 9 Sinä syötät heidy kylläl Oman taloin syömizil, Sinä juotat heidy Omas ilonvirras. 10 Sinun luo on elaijan nouzemu, Sinun valgies myö suammo valgien. 11 Ole iellehgi armolline niilöile, ket tundietah Sinuu, da oigeimieline niilöile, ket eletäh tovel. 12 Anna ei polle minun piäle ylbien jalgu, anna ei aja minuu iäre jumalattoman käzi. 13 Kačo, kunne kuavuttih zakonanrikkojat! Hyö langettih i ei voija nosta.
с русским текстом