Библия
Выбрать язык
Книги Ветхого Завета
Книги Нового Завета
с русским текстом
PSALTIRI
34 Psalmu
1 Davidan psalmu. Ižändy, suudi niidy, kuduat viettih minuu suudoh!
Torua niidy vastah, kuduat toratah minuu vastah!
2 Ota toravehkehet käzih, ota suojusraudu,
tule minule abuh!
3 Tembua miekku huodras,
salbua dorogu niilöil, ket ajetah minuu jälles.
Sano minun hengele: «Minus on sinun piäzendy».
4 Puututtahes huigieh da nagrettavakse net,
ket ečitäh minun hengie.
Pajettahes iäre da nähtähes huigiedu net,
ket tahtotah minule pahua.
5 Levittähes hyö kui aganot tuules,
ajakkah heidy iäre Ižändän anheli.
6 Rodikkah heijän dorogu libei da pimei,
ajakkah heidy jälles Ižändän anheli.
7 Hyö viäryöttäh kaivettih minule haudu,
ku suaha minuu sih kui verkoh,
viäryöttäh kaivettih se minun hengen menokse.
8 Anna vuottamattah tulou heile häviendy,
anna tabuau heidy verko, kudai hyö pandih minule,
anna puututah hyö sih omakse häviendäkse.
9 A minun hengi rubieu pidämäh hyviä mieldy Ižändäs,
ihastuu, gu suau piäzendän Hänen vuoh.
10 Joga luuhut minun sanou:
«Ižändy, ongo ken toine Sinun jyttyine,
Sinun, kudai piästät väittömän vägeväs,
köyhän da kurjan kiškojas?»
11 Kielahat tovestajat nostah da kyzelläh minul
sidä, midä minä en tiijä.
12 Hyö maksetah minule hyväs pahal,
minun hengi on armoitoi.
13 Konzu hyö oldih voimattomat,
minä selgiin tuskusobih,
minä muokkain iččie pyhitändäl,
moliimmos tävves syväimes
14 kui lähimäzen, kui vellen puoles.
Minä painoin piän, olin pahas mieles
kui se, kudai itköy omua muamua.
15 A konzu minule rodih paha,
hyö oldih hyväs mieles da kerävyttih yhteh,
kerävyttih minus ymbäri net moittijat.
Hyö kirottih minuu heittelemättäh, en tiijä mikse.
16 Hyö irvistettih minule silmih,
kridžaitettih hambahii.
17 Ižändy, viego hätken Sinä kačot tädä?
Piästä minuu heijän hambahis,
piästä minun hengi,
minun aino hengi nualois leijonois!
18 Sit minä kiitän Sinuu jumalankoin suures sluužbas,
ylendän Sinun nimie suuren rahvasjoukon keskes.
19 Anna ei nagreta minuu minun vihaniekat,
minä olen oigei.
Anna ei iškietä toine toizele silmiä net,
ket viäryöttäh vihatah minuu.
20 Heijän paginat ei olla rauhan paginoi,
a muan hil՚l՚azii vastah hyö havvotah pahua.
21 Kijat avvoi hyö kirrutah minule: «Hyvä, hyvä!
Myö näimmö omil silmil, midä oli».
22 Ižändy, Sinä näit kaiken tämän,
älä ole vaikkani!
Ižändy, älä loittone minus!
23 Ižändy, Jumalazeni, havaču,
nouze puolistamah minuu suvvos,
vedämäh minun dieluo.
24 Ižändy, Jumalazeni!
Suudi minuu Sinun oigiel suvvol!
Älä anna minun vihaniekoile nagrua minun piäle.
25 Anna ei sanota omas syväimes: «Hyvä, hyvä, meidy myö rodih!»
Anna ei sanota: «Myö lainoimmo hänen!»
26 Anna roihes huigei da haskargei kaikile,
ket ihastellahes minun ozattomuttu.
Huijattahes da nagrettahes niidy, ket suurendellahes minun ies.
27 Piettähes hyviä mieldy da ihasteltahes net,
ket tahtotah minule oigevuttu.
Sanottahes ainos: «Ylendetty olgah Ižändy,
kudai tahtou rauhua Omale käskyläzele».
28 I minun kieli ainos ylendäy Sinun oigiedu mieldy,
kiittäy Sinuu joga päiviä.
Глава 34
