1Pajojoukon ohjuajale. Ižändän käskyläzen Davidan psalmu, kudaman David pajatti Ižändäle, konzu Ižändy piästi händy Saulan da kaikkien vihaniekkoin käzis. Häi sanoi sit: 2 Minä suvaičen Sinuu, Ižändy. Sinä olet minun vägi. 3 Sinä olet minun lujus da linnoitus, minun Piästäi. Jumal on kallivo, Hänes minä ečin suojua. Häi on minun suojusraudu, minun abu da puolistai. 4 Ylendetty olgah Ižändy! – nenga minä kirrun da piäzen vihaniekois. 5 Kuolendumuokat kiärittih minuu, viäryön virrat pöllätettih minuu. 6 Tuonilmazen čiepit sivottih minuu, surmanverkot tavattih minuu. 7 Suures hiäs minä kučuin Ižändiä, kirruin abuh minun Jumalua. Häi kuuli minun iänen Omas pyhäkois, minun kirrundu meni Hänen korvih. 8 Sit mua lekahtih da tanizi, vabahtettihes da liikuttih sijois mägien alustat, gu Jumalan viha sytyi. 9 Tavan savvu nouzi Hänen huogaimis, da kaiken syöjy tuli lähti Hänen suuspäi, tulizet hiilet lennettih Hänes. 10 Häi kaldai taivahat da heityi alah, pimei pilvi oli Hänen jalgoin al. 11 Häi istuihes Heruvimale da lähti lendoh, Häi huškahtih tuulen siivil. 12 Häi otti kattiekse pimien, kiärihes mustih vezih, pimielöih pilvih. 13 Hänen ies liikui valgei läpetys, sit lähtiettih Hänen pilvet, rais da tulihiilet. 14 Ižändy jyrizi taivahis, Ylimäine andoi Oman iänen, lykki ragehii da tulizii hiilii. 15 Häi ambui Omat piilit, levitti net. Iški tuldu, ripoitti tuleniškut. 16 I ozutettihes viennouzemat, avavuttih muan alustat Sinun vägeväs käskys, Sinun vihan tuulen puhaldukses, Ižändy. 17 Häi oijendi käin korgevuospäi da otti minuu. Häi vieldi minuu suuris vezis. 18 Häi piästi minuu vägeväs vihaniekas, minun vihuajis, kuduat oldih vägevembät minuu. 19 Hyö hypättih minuh käzin minun jygiel aijal, no Ižändy nouzi minun tuvekse. 20 Häi toi minuu välläle kohtale, piästi minuu, gu oli mieldynyh minuh. 21 Ižändy maksoi minule palkan minun oigevuon mugah. Häi palkičči minuu minun käzien puhtahis ruadolois. 22 Minä olen pyzynyh Ižändän jällil, en ole hyllännyh omua Jumalua. 23 Kai Hänen käskyt ollah ainos minul mieles, Hänen zakonois minä en kieldävynnyh. 24 Minä en heitellyhes Hänen ies, ainos vardoičimmos, ku ei luadie riähkiä. 25 I Ižändy palkičči minuu, gu olen oigeimieline, gu minun ruavot ollah puhtahat Hänen silmien ies. 26 Ižändy, armollizele Sinä olet armolline, oigiele olet oigei, 27 puhtasmielizenke olet puhtasmieline, muanittelijanke – hänen ruadoloi myö. 28 Sinähäi piästät painettuloi, a ylbielöin silmii painat alah. 29 Ižändy, Sinä sytytät minun lampun, Jumalazeni andau valgiedu minun pimieh. 30 Sinunke minä voitan torajoukon, minun Jumalan avul piäzen linnan seinis piäliči. 31 Jumalan dorogu on vijatoi, Ižändän sana on puhtas, Häi on suojusraudu kaikile, ket uskotah Häneh. 32 Ken on Jumal, gu ei Ižändy, ken on suojus, gu ei meijän Jumal? 33 Jumal vyöttäy minuu väil, ozuttau minule oigien tien. 34 Häi luadiu minun jallat kirkielöikse kui pedran jallat, Häi ohjuau minuu korgiele. 35 Häi opastau minun käit toruamah, käzivarret vaskijouhtu vedämäh. 36 Ižändy, Sinä olet minule suojusravvannu, Sinun oigei käzi on minule tuvennu, Sinun armo luadiu minuu suurekse. 37 Sinä luajit minun askelet lujikse, minun polvet ei säristä. 38 Minä ajan jälles vihaniekkoi da tabuan heidy, en kiänny järilleh, kuni en hävitä heidy. 39 Minä išken heidy, i hyö ei voija enämbiä nosta. Hyö sorrutah minun jalgoin alle. 40 Sinähäi vyötit minuu väil torah niškoi, painoit minun vastustajii minun jalgoin alle. 41 Sinä kiännytät pagoh minun vihaniekat, i minä hävitän heidy. 42 Hyö kirrutah, ga ei ole avvuttajua. Hyö kučutah Ižändiä, ga Häi ei vastua heile. 43 Minä levitän heidy kui tuhkat tuuleh, pollettelen heidy kui pihaligua. 44 Sinä piästit minuu rahvahan vastustandas, panit minuu toisvierozien ižändäkse. Muailman rahvahat, kudamii minä en tiedänyh, ollah nygöi minun vallas. 45 Hyö kuunnellah minuu enne, gu minä käsken, vierasmualazet mielistellähes minun ies. 46 Hyö varatah da säristäh omien kiviseinien tagan. 47 Ižändy eläy! Kiitetty olgah minun Puolistai! Ylendetty olgah Jumal, Piästäjäzeni! 48 Jumal tazuau minun puoles, Häi suattau muailman rahvahat minun vallan alle. 49 Häi piästäy minuu vihaniekois, nostau minuu heidy ylembäkse, piästäy vägivaldazis ristikanzois. 50 Sikse rubien ylendämäh Sinuu, Ižändy, muailman rahvahien keskes, rubien pajattamah kiitändysanoi Sinun nimele. 51 Sinä autat Oman rahvahan suarii, olet armolline Omale voijeltule, Davidale, da hänen jälgeläzile ilmazenijän.
с русским текстом