1Davidan malittu. Ižändy, kuule minun tozi! Kuule minun kirrundu, ota vastah malittu puhtahas suus! Minä en kielastele. 2 Sinus tulou minule oigei suudo, Sinun silmät nähtäh tozi. 3 Sinä hyvin kačoit minun syväimen, tulit yöl minun luo, opit minun mielii, no nimidä pahua et löydänyh. Minun sanat ei erota minun mielis. 4 Kaikis muallizis ruadolois minä pyzyn Sinun sanas, minä vardoičemmos vägivaldazen dorogois. 5 Lujenda minun askelet Sinun matkoil, anna ei hairahtuta minun jallat. 6 Minä kučun Sinuu abuh, Sinähäi kuulet minuu, Jumal. Kiännä korvu minuh päi, kuule minun sanat. 7 Ozuta Oma kummanhyvys, Sinä kaikkien Sinuh uskojien Piästäi. Omal vägeväl käil Sinä piästät heidy vihaniekois. 8 Vardoiče minuu kui silmyteriä, peitä minuu Sinun siibien alle 9 jumalattomis, kuduat tullah minuh käzin, minun hengen vihaniekois, kuduat ollah minus ymbäri. 10 Heijän syväin on kovan kuoren al, heijän paginat ollah ylbiet. 11 Hyö ollah minun kinčuksis, ymbäri minus, hyö vuotetah vai aigua, ku polgie minuu muah. 12 Hyö ollah kui leijon, kudual on himo sualistu, kui leijonanpoigu, kudai hiiveleh peitos. 13 Nouze, Ižändy! Ennitä jumalattomii da paina heidy muah! Piästä minun hengi Sinun miekal jumalattomis! 14 Ižändy, Piästä minuu Omal käil pahoin rahvahien vallas, niilöis, kudamil on vai tämä elaigu. Sinä täytät heijän vačat Sinun eloaitas, heijän lapset syvväh kylläl, jiäy heijän lapsien lapsilegi. 15 A minä olen oigei, minä voin nähtä Sinuu. Maguamas nostuu muudu en tahto, ku vai kaččuo Sinuh.
с русским текстом