1Davidan kiitändypajo. Minä ylendän Sinuu, Jumalazeni, minun Suari, kiitän Sinun nimie ainos da ilmazenijän. 2 Joga päiviä kiitän Sinuu, ylendän Sinun nimie ainos da ilmazenijän. 3 Suuri on Ižändy, Händy pidäy kiittiä, Hänen suurus on tiijustamatoi. 4 Polves polveh kiitetäh Sinun ruadoloi da sanellah Sinun suurii kummii. 5 A minä duumaičen Sinun suuruttu da korgiedu kunnivuo, Sinun kummanruadoloi. 6 Sinun ruavot ollah suuret da varattavat, saneltahes niilöis kaikile. Minägi sanelen Sinun suuruos. 7 Sinun suurdu hyvytty ruvetah mustelemah da pajattamah ylendyspajuo Sinun toves. 8 Hyvä da armolline on Ižändy, tirpačču da suvaiččii. 9 Hyvä on Ižändy kaikile, Häi on armolline kaikis Omis ruadolois. 10 Ižändy, kiitettähes Sinuu kai Sinun ruavot, kiitettähes Sinuu Sinun pyhät! 11 Saneltahes Sinun valdukunnan kunnivuo, paistahes Sinun suureh vägeh näh, 12 ku rahvas tiijustettas Sinun suuris ruadolois, tiijustettas Sinun valdukunnan kunnivos da suuruos. 13 Sinun valdukundu on ilmanigäine valdukundu, Sinä piet valdua polves polveh. Ižändy on uskottavu kaikis Omis sanois da pyhä kaikis Omis ruadolois. 14 Ižändy on tuvennu kaikile kuadujile, Häi nostau kaikkii painettuloi. 15 Kaikkien silmät kačotah Sinuh, i Sinä annat heile heijän einehen omal aijal. 16 Sinä avuat Oman käin, i Omas hyvyös syötät kaikkii elävii. 17 Ižändy on oigeimieline kaikes, Häi on hyvä kaikis Omis ruadolois. 18 Ižändy on kaikkien lähäl, ket kirrutah Händy abuh, kaikkien lähäl, ket kirrutah Händy oigies syväimes. 19 Häi täyttäy Händy varuajien tahtot. Häi kuulou heijän kirrundan da piästäy heidy. 20 Ižändy akkiloiččou kaikkii, ket suvaijah Händy, a kaikkii jumalattomii hävittäy. 21 Anna minun suu ylendäy Ižändiä, anna kai Hänen luajitut kiitetäh Hänen pyhiä nimie ainos dai ilmazenijän.
с русским текстом