Библия
Выбрать язык
Книги Ветхого Завета
Книги Нового Завета
с русским текстом
PSALTIRI
143 Psalmu
1 Davidan psalmu Goliafua vastah. Kiitetty olgah Ižändy, minun kallivo!
Häi opastau minun käit toruamah,
sormet pidämäh toravehkehii.
2 Häi on minun armon andai,
minun varuamatoi olendukohtu,
minun Puolistai da Piästäi,
minun suojusraudu, kuduan tuakse peityn.
Häi andau rahvahat minun valdah.
3 Ižändy, mibo on ristikanzu?
No Sinä duumaičet händy.
Mibo on ristikanzan lapsi?
No Sinä piet huoldu hänes.
4 Ristikanzu on kui tuulen hengähtys,
hänen päivät hävitäh kui kuvahaine.
5 Ižändy, kaldua Sinun taivas da astu alah!
Kosketa mägilöi, i net ruvetah savvuomah!
6 Iške tuldu, levitä minun vihaniekkoi,
ammu Sinun piilit, lope heidy!
7 Oijenda käzi korgevuksispäi, avvuta minuu!
Piästä suuris vezis, vierasmualazien käzis,
8 kudamien suu sanou kielastussanoi,
kudamien oigei käzi menettäy.
9 Jumal, minä pajatan Sinule uvven pajon,
soitan Sinule kymmenkielizel arfal.
10 Sinä annat suariloile voiton,
Sinä piästät Davidan, Sinun käskyläzen,
vihažas miekas.
11 Piästä minuu vierasmualazien käzis,
kudamien suut kielastellah,
kudamien oigei käzi menettäy.
12 Oldahes meijän poijat kui taimenet,
kuduat kazvetah suurekse jo nuorennu,
meijän tyttäret kui vestetyt paččahat dvorčas.
13 Meijän aitat oldahes tävvet,
leibiä olgah kylläl,
lammaskarju suurekkah tuhanzin,
olgah niidy pimei pilvi meijän niittylöil.
14 Meijän žiivatat oldahes kylläzet da vägevät.
Älgäh roikkah meile ni pillua, ni hädiä,
älgäh kuulukkah itkuu meijän pihoil.
15 Ozakkahat ollah sen muan rahvas,
kudamil on kai tämä.
Ozakkahat ollah rahvas,
kudamil Jumalannu on Ižändy.
Глава 143
