Библия
Выбрать язык
Книги Ветхого Завета
Книги Нового Завета
с русским текстом
PSALTIRI
142 Psalmu
1 Davidan psalmu konzu hänen poigu Avessalom ajoi händy jälles. Ižändy, kuule minun malittu,
kuundele minun pokoroičendua!
Sinä olet uskottavu da oigei,
vastua minule!
2 Älä kuču suudoh Sinun käskylästy,
gu niken ei ole oigei Sinun ies.
3 Vihamies ajau jälles minun hengie,
polgou jalgoih minun elaijan,
panou minuu elämäh pimieh,
kus eletäh ammui kuolluot.
4 Minun hengi vaibuu, syväin jämpistyy.
5 Minä mustelen endizii aigoi,
tutkin kaikkii Sinun ruadoloi,
ajattelen Sinun käzil luajittuloi ruadoloi.
6 Minä oijendan Sinuh päi omat käit,
minun hengi igävöiččöy Sinuu,
kui kuivu mua tahtou vetty.
7 Ižändy, vastua minule teriämbi!
Väzyin vuottua.
Älä peitä minus silmii,
eiga minä roimmos kui kalmahmenii.
8 Anna minule huondestu myö kuulta Sinun armos,
gu Sinus minä ečin suojua.
Ižändy, Sinun puoleh minä kiännyn,
ozuta minule dorogu, kuduadu pidäy astuo.
9 Ižändy, piästä minuu vihaniekois!
Sinus minä ečin suojua.
10 Opasta minuu täyttämäh Sinun tahtuo,
Sinähäi olet minun Jumal.
Sinun hyvä Hengi anna vedäy minuu oigevuon muah.
11 Sinun nimen täh, Ižändy, anna minule eliä!
Sinun toven täh piästä minun hengi ahtahas!
12 Sinun armon täh hävitä minun vihaniekkoi,
hävitä kaikkii minun hengen ahtistajii,
minähäi olen Sinun käskyläine.
Глава 142
