Библия
Выбрать язык
Книги Ветхого Завета
Книги Нового Завета
с русским текстом
PSALTIRI
134 Psalmu
1 Alliluija!
Kiittäkkiä Ižändän nimie,
kiittäkkiä, työ Ižändän käskyläzet,
2 työ, kuduat piettö sluužbua Ižändän pyhäkois,
meijän Jumalan koin pihois!
3 Kiittäkkiä Ižändiä, Häi on hyvä!
Pajatakkua kiitändypajo Hänen nimele,
Hänen nimi on hyvä da čoma!
4 Ižändy valliči Omakse Juakoin rovun,
Izrail՚an Omakse rahvahakse.
5 Minä tiijän: Ižändy on suuri,
meijän Ižändy on kaikkii jumaloi suurembi.
6 Ižändy luadiu kai, midä tahtou
taivahas dai mual,
meris dai kaikis pohjattomis syvyzis.
7 Häi nostau pilvet muan reunoil,
luadiu tuleniškut da vihman,
piästäy tuulen sen aitois.
8 Häi tapoi kai enzipoijat Jegiptas,
kui ristikanzoin mugai žiivattoin.
9 Sinun keskel, Jegiptu, Häi luadi
kummii da merkiruadoloi
faraonale da kaikile hänen käskyläzile.
10 Häi voitti äijien mualoin rahvahat,
Häi tapoi suuret suarit:
11 Amorein suarin Sigonan
da Vasanan suarin Ogan.
Häi voitti kai Hanaanan muan valdukunnat
12 da andoi niilöin muat Omale rahvahale,
jälgiperäkse Izrail՚ale.
13 Ižändy, Sinun nimi pyzyy ilmazenijän.
Sinuu mustetah polves polveh.
14 Ižändy rubieu suudimah Omua rahvastu
oigiel suvvol.
Häi armahtau Omii käskyläzii.
15 Toisvierozien jumalat ollah kuldua da hobjua,
ristikanzan käzil luajitut.
16 Niilöil on suu, no net ei paista,
niilöil on silmät, no net ei nähtä,
17 niilöil on korvat, no net ei kuulta,
eigo niilöil lähte hengi suus.
18 Niilöin luadijat roijah niilöin jyttymikse,
mugai kaikin, ket niilöih luotetah.
19 Izrail՚an rodu, kiitä Ižändiä!
Aaronan rodu, kiitä Ižändiä!
20 Leevien rodu, kiitä Ižändiä!
Kaikin, ket varuatto Ižändiä, kiittäkkiä Händy!
21 Kiitetty olgah, Ižändy Sional,
Häi, kudai eläy Jerusalimas!
Alliluija!
Глава 134
