1 Alliluija! Konzu Izrail՚u lähti Jegiptaspäi, konzu Juakoin sugu jätti vieraskielizen rahvahan, 2 Ižändy luadi Juudas Ičelleh pyhäkoin, Izrail՚as Oman valdukunnan. 3 Meri nägi tämän da pageni, Jordanan viet kiännyttih järilleh päi. 4 Mäit hypittih kui bošit, a mättähät kui lambahat. 5 Mibo sinule rodih, meri? Mikse lähtit pagoh? Mikse sinä virduat järilleh päi, Jordan? 6 Mäit, mikse työ hypittö kui bošit? Mättähät, mikse hypittö kui lambahat? 7 Särize mua Ižändän ies, Juakoin Jumalan silmien ies! 8 Häi muuttau kallivon järvekse, kiven viennouzemakse. 9 Älä meile, Ižändy, älä meile anna kunnivuo, vaiku Omale nimele anna kunnivo Sinun hyvyön täh, Sinun armon täh. 10 Mikse andua valdu toisvierozile sanuo: «Kusbo on heijän Jumal?» 11 Meijän Jumal on taivahis dai mual, Häi luadiu kai, midä tahtou. 12 A heijän valehjumalat ollah hobjua da kuldua, rahvahien käzil luajitut. 13 Niilöil on suu, no net ei paista, niilöil on silmät, no net ei nähtä, 14 niilöil on korvat, no net ei kuulta, niilöil on nenä, no net ei voija n՚uustua. 15 Niilöil on käit, no net ei kosketeta, niilöil on jallat, no net ei kävellä, niilöin kerois ei lähte iäni. 16 Niilöin luadijat roijah niilöin jyttymikse, mugai kaikin, ket pietäh toivuo niilöih. 17 Sinä, Izrail՚an rahvas, luota Ižändäh, Häi on sinun abu da suojusraudu! 18 Aaronan sugu, luota Ižändäh, Häi on sinun abu da suojusraudu! 19 Kaikin, ket varuatto Ižändiä, luottakkua Häneh! Häi on teijän abu da suojusraudu. 20 Ižändy mustau da ozittau meidy, Häi ozittau Izrail՚an suguu, ozittau Aaronan suguu. 21 Häi ozittau kaikkii, ket varatah Ižändiä, pienii dai suurii. 22 Anna ližiäy teidy Ižändy enämbän da enämbän, teidy da teijän lapsii. 23 Hyvitäkkäh teidy Ižändy, Häi, kudai luadi taivahan da muan. 24 Taivas on Ižändän taivas, a muan Häi andoi ristikanzoile. 25 Ei kuolluot ylendetä Ižändiä, ei niken niilöis, kudamat heityttih kalmah. 26 A myö, kuduat elämmö, ylendämmö Ižändiä nygöi dai ilmazenijän. Alliluija!
с русским текстом