Библия
Выбрать язык
Книги Ветхого Завета
Книги Нового Завета
с русским текстом
PSALTIRI
2 Psalmu
1 Davidan psalmu. Mikse muailman rahvahat nostah valdua vastah,
da rahvasrovut ečitäh riidua?
2 Mikse muailman suarit nostah torah,
da vallanpidäjät pietäh keskenäh paginoi
Ižändiä da Hänen Voijeltuu vastah?
Hyö sanotah:
3 «Myö katkuammo heijän nuorat,
lykkiämmö iäre heijän čiepit».
4 Taivahas olii nagrau heidy,
Ižändy moittiu heidy.
5 Häi sanou heile vihas,
taval pöllättäy heidy:
6 «Minä iče panin Oman Suarin Sionale,
Minun pyhäle mäile».
7 Minä sanelen Ižändän sanotut sanat.
Häi sanoi Minule: «Sinä olet Minun Poigu.
Tänäpäi Minä sain Sinuu.
8 Pakiče Minul, i Minä annan
muailman rahvahat Sinule jälgiperäkse
da kaiken muan, agjas agjah suate, Sinun valdah.
9 Sinä išket heidy raudazel valdukepil,
murrat heidy, kui murendetah saviastieloi».
10 Sikse pidäkkiä mieldy, suarit!
Opastukkua, muan sud՚d՚at!
11 Kuunnelkua Ižändiä varavo vačas, säriskiä,
kirgukkua hyväs mieles Hänen ies.
12 Kunnivoikkua Poigua, eiga Häi suuttuu,
i työ häviettö teijän matkas,
gu Hänen viha syttyy terväh.
Ozakkahat ollah kaikin, ket uskotah Häneh.
Глава 2
