Выбрать язык
Книги Ветхого Завета
Книги Нового Завета
с русским текстом1 Izrail՚ keräi kai omat elot da yhtes perehenke lähti matkah. Virsavieh tulduu häi toi verhat oman tuatan Isakan Jumalale.2 Jumal sanoi Izrail՚ale yöllizes nävys: «Juakoi, Juakoi!» «Da», sanoi Juakoi.3 Jumal sanoi: «Minä olen Jumal, sinun tuatan Jumal. Älä varua mennä Jegiptah, sie Minä luajin sinus suuren rahvahan.4 Minä iče lähten sinunke Jegiptah. Minä iče tuon sinuu järilleh. Josif omal käil salbuau sinun silmät.»
5 Juakoi lähti Virsaviespäi. Kärilöil, kuduat työndi faraon heih niškoi, Izrail՚an poijat lähtiettih vedämäh omua tuattua Juakoidu, omii lapsii da omii akkoi.6 Hyö otettih keräle karjat dai kai elot, kuduat suadih Hanaanan muas, i tuldih Jegiptah – Juakoi dai kai rodu hänenke.7 Omii poigii, vunukkoi, tyttärii da kogo oman rovun toi häi Jegiptah.
8 Täs ollah Izrail՚an jälgeläzien, kuduat tuldih Jegiptah, nimet: Juakoi da hänen poijat. Enzipoigu Ruvim.9 Ruviman poijat: Hanoh, Fallu, Hetsron da Harmi.10 Simeonan poijat: Jemuil, Jamin, Ogad, Jahin, Tsohar da Saul – hanaanalazen naizen poigu.11 Leevien poijat: Girson, Kaaf, Merari.12 Juudan poijat: Ir, Onan, Šela, Fares i Zara. Ir da Onan kuoltih vie Hanaanas olles, a Faresale roittih poijat Esrom da Hamul.13 Issaharan poijat: Fola, Fuva, Jov da Šimron.14 Zavulonan poijat: Sered, Elon, Jahleil.15 Täs ollah Juakoin poijat, kuduat sai Liija Mesopotamies, da vie tytär Dina. Kaikkiedah niidy poigii da tyttärii oli kolmekymmen kolme.16 Gadan poijat: Tsifion, Haggi, Šuni, Etsbon, Eri, Arodi, Areli.17 Asiran poijat: Imna, Išva, Išvi da Bria. Heijän sizär Serah. Brian poijat: Hever da Malhiil.18 Nämien kuvventostu Juakoin jälgeläzien kandumuamo oli Zelfa, kuduan Lavan andoi käskyläzekse omale tyttärele Liijale.19 Juakoin akan Rahilin poijat oldih Josif da Veniamin.20 Jegiptas Josifale rodiihes kaksi poigua: Manassii da Efrem, kuduat sai hänele Asenefa, Iliopolisan papin Potiferan tytär.21 Veniaminan poijat oldih Bela, Beher, Ašbel; [Belan poijat oldih] Gera, Haaman, Ehi, Roš, Muppim, Huppim da Ard.22 Hyö ollah Juakoin da Rahilin jälgeläzet – nellitostu hengie.23 Danan poigu: Hušim.24 Neffaliman poijat: Jahtseil, Guni, Jetser, Šillem.25 Sit oldih Juakoin jälgeläzet Vallas, kuduan Lavan andoi omale tyttärele Rahilile – seiččie hengie.26 Juakoin jälgeläzii, kuduat tuldih hänenke Jegiptah, oli kuuzikymmen kuuzi hengie, n՚eveskät ližäkse.27 Josifal oli kaksi poigua, hyö rodittihes Jegiptas. Muga Juakoin rodukundah, kudai tuli [Juakoinke] Jegiptah, kuului seiččiekymmen [viizi] hengie.
28 Juakoi työndi Juudan ielpäi Josifan luo sanomah, gu häi vastuas heidy Gesemas. Hyö tuldih Geseman muakundah.29 Josif val՚l՚asti oman kärin da lähti tuatalleh Izrail՚ale vastah Gesemah. Hänen nähtyy tartui hänele kaglah, hätken itki hänel kaglas.30 Izrail՚ sanoi Josifale: «Nygöi voin kuolta. Minä näin sinuu, sinä olet vie hengis!»
31 Sit Josif sanoi vellile da kaikile tuatan perehele: «Nygöi minul pidäy mennä faraonan luo sanomah hänele, gu minun luo Hanaanaspäi tuldih vellet da kai meijän rodu,32 i gu hyö ollah paimoit, karjan kaččojat, tuodih tänne kai omat lambahat, kozat dai lehmät, tuodih kai elot.33 A työ, konzu faraon kyzyy, midä piettö ruavonnu,34 sanokkua: ‘Myö, sinun orjat, olemmo pieneššyssah nämih päivissäh karjankaččojat, myö dai meijän tuatat.’ Sit teidy jätetäh tänne Geseman muah, sikse gu kaikkii, ket paimendetah lambahii, jegiptalazet pietäh ei-puhtahinnu.»
Глава 46