Выбрать язык
Книги Ветхого Завета
Книги Нового Завета
с русским текстомИона скöрмö
1 Иона шогö усис таысь да ёна скöрмис.2 Сiйö кевмысьöмöн норасис Господьлы: «Господьöй, кор ме вöлi на аслам муын, ме тöдi нин, мый тадзи лоас. Ме та понда и пышйи Фарсисö. Ме тöдi, мый Тэ бур да мелi сьöлöма Ен, Тэнад терпитöмыд ыджыд, Тэнад буралöмлы абу помыс. Тэ дась бöр босьтны Ассьыд мыждана шуöмтö.3 Та вöсна, Господьöй, босьт менсьым лолöс – бурджык меным кувны олöм дорысь».4 Господь юалiс: «Тайö öмöй тэнö сэтшöма скöрмöдiс?»
5 Иона петiс карысь да кольччис кар асывладорö. Сэнi вöчис аслыс лэбувтор да пуксис вуджöр улö. Виччысис, мый лоö карыскöд.6 Сэки Господь Ен быдтiс ыджыд коръя быдмöг, медым вуджöрнас сайöдны Ионаöс да лöньöдны сiйöс дöзмöмсьыс. Иона ёна нимкодясис быдмöглы.7 Мöд луннас кыа петiгöн Ен ыстiс вегыльöс. Вегыль кутiс сёйны быдмöгсö, и сiйö косьмис.8 А кор петiс шондi, Ен ыстiс чизыр асыв тöв. Шондi пöжис Ионалысь юрсö. Сiйö дзикöдз лёшмунiс да виччысис кулöм. Иона шуалiс: «Бурджык меным кувны олöм дорысь».9 Ен юалiс Ионалысь: «Быдмöгыс понда öмöй татшöма скöрмин?» Мöдыс вочавидзис: «Да. Весиг овнысö ог кöсйы».10 Сэки Господь шуис: «Тэ шогсян быдмöг вöсна, кодöс тэ эн быдты, эн дöзьöрит. Сiйö быдмис öти войöн, и öти войöн косьмис.11 Менам сьöлöмöй тшöтш шогсьö Ниневия вöсна, тайö ыджыд карыс вöсна. Сэнi сё кызь сюрсысь унджык олысь, кодъяс оз кужны торйöдны шуйга кинысö веськыдсьыныс. Нöшта сэнi уна пемöс на эм».
Глава 4