Your word is a lamp to my feet

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ОԒӘӇ ЭԒТЫ НЭПЕК

Глава 45

Иосиф йайԓаԓ пеԓа аԉәсәԓ

1Ԓўв пўӈԓәԓән ԓойәм хŏйатәт уԓман Иосиф нŏпсәԓ шӑкәс пӑ ԓўв ўваԓтәс: «Ма эԓтэм йэԓ мӑнаты!» Щишән, нэмәԓты пўӈәԓ хŏйат ӑнтом ус, хун ԓўв йайԓаԓа аԉәсәс.

2Ԓўв щиты такан хоԓԓаԓтәс пӑ, Египет хŏйатәтән хуԓса пӑ фараон хот хŏйатәтән хуԓса.

3Иосиф пӑ йайԓаԓа йастәс: «Ма – Иосиф, ащем хŏԓна ԓыԓәӈ?» Туп йайԓаԓ нэмәԓты йастәты ӑт верәтсәт, ԓыв ӑт уйәтсәт, мўй нумәсты.

4Иосиф йайԓаԓа йастәс: «Ма хŏщайэм вана йўваты». Ԓыв ванамәсәт. Ԓўв йастәс: «Ма – Иосиф, нын апщан, хŏйтан Египта нын тынысԓән;

5туп ин аԓ хошийаты пӑ нынан аԓ нўрмәԓтаԓән мӑнэм ты тыныман урәӈән, щит Турәм мӑнэм нын йэԓпанән китсәԓы нын уԓәпсайән шавиты урәӈән;

6кӑт тӑԓа йис, хŏты мўвән ԓэԓԓы йӑт йŏхтәс: хŏԓна вет тӑԓ нэмәԓты мўва омәсты ӑт питԓа, нэмәԓты ӑкәтты ӑт питԓа;

7Турәм мӑнэм нын йэԓпанән китсәԓы, нынан пӑ нын тыхәԓ тэԓԓән мўвән хӑйты урәӈән пӑ нын уԓәпсайән вŏԓаӈ щирән шавиты урәӈән.

8Щишән, ӑнта нын мӑнэм ты китсәԓән, щит Турәм, Ԓўв мӑнэм фараон ԓӑӈкәр хуйа пŏтсәԓы, пӑ хŏԓ ԓўв хŏтәԓ кущайа, пӑ Египет мўв тӑйтаӈ ун кущайа ищи.

9Ащем хŏща сора мӑнаты пӑ ԓўвеԓа пŏтәртаты: ‘Иосиф пŏхен щиты йастәԓ: Турәм мӑнэм Египет мўв ԓŏватән кущайа пŏтсәԓы; ма хŏщайэм йŏхта, аԓ рŏна;

10Гесем мўв щуӈән нӑӈ уԓты питԓән; ма пўӈԓэмән ванән нӑӈ питԓән, нӑӈ пŏхԓан па, нӑӈ пŏхԓан пŏхәт па, ай пӑ ун войԓан, пӑ иса, мўй нӑӈ тӑйԓән;

11пӑ нӑӈен щита ԓапәтты верәтԓэм, ԓэԓԓы йӑт хŏԓна вет тӑԓ питәԓ, нӑӈена пӑ нӑӈ хотәӈ ŏтԓана нўшайа ӑт питты урәӈән’.

12Тӑта щи, нын сэмԓән пӑ Вениамин апщем сэмәт ватԓәт, щит ма нын пиԓанән пŏтәртԓәм;

13Египет мўвән ма ун кущайа уԓты уԓәпсайэм эԓты пӑ иса, мўй нын тӑта ватсәты, ащема пŏтәртаты, пӑ сорашәк ащем ты тўваԓән».

14Щӑԓта ԓўв Вениамин апщеԓ ӑпәԓсәԓы пӑ хоԓԓәс; Вениамин пӑ, ԓўвеԓ ӑпәԓтыман, хоԓԓәс.

15Пӑ йайԓаԓ хŏԓ мосәԓтәсԓы, ԓывиԓаԓ ӑпәԓтыман, хоԓԓәс. Щӑԓта йайԓаԓ ԓўв пиԓәԓән пŏтәртсәт.

Фараон Иакова Египет мўва касәԓты эсәԓсәԓы

16Иосиф йайԓаԓ йŏхтәм айкеԓ фараон унты йŏхтәс; фараон митйохԓаԓ пиԓән нŏх амтәс.

17Фараон Иосиф пеԓа йастәс: «Йайԓан пеԓа йаста: ‘Тӑмиты вераты: войԓән шӑншәт ԋаԋ ԓатән ԓэԓтаԓән пӑ Ханаан мўва мӑнаты;

18ащан пӑ нын тыхәԓ тэԓԓән ўйаты, пӑ ма хŏщайэм йŏхтаты; ма нынана мет йӑм тӑха Египетән мӑԓәм, мўвән энмәԓтәм мет йӑм ԓэвпәсәт нын ԓэты питԓәты’.

19Нӑӈена ин партԓэм ԓывиԓаԓа йастәты: ‘Щиты вераты: Египет мўв эԓты колесница ԓовәӈ ухԓәт ԋаврэмԓән пӑ имиԓән урәӈән ўйаты, ащан ты тўваԓән пӑ нын ты йŏхтаты;

20пŏрмасԓән эԓты аԓ нумәсаты, Египет мўвән мўй йӑм уԓ, щит эԓты нынана мӑԓәм’».

21Израиль пŏхәт щиты щи версэԓ. Колесница ԓовәӈ ухԓәт Иосиф ԓывиԓаԓа мӑсԓы, хŏты фараонән партса, пӑ йушән тӑрәмты арат хӑԓ мӑс;

22кашәӈ хŏйата йӑԓәп ԓумтәм сŏх мӑс, Вениамина пӑ хуԓәмсот щел ŏх пӑ вет йӑԓәп ԓумтәм сŏх мӑс;

23ащеԓа пӑ Египет мўв мет йӑм пŏрмасәтән ԓэԓтәм йаӈ осёл вой китәс, пӑ йаӈ осёл нэ вой ԋаԋ ԓатән, ԋаԋән пӑ хӑԓы хирән ащеԓа йŏхԓы йуш кеша ԓэԓсәԓы.

24Щӑԓта йайԓаԓ эсәԓсәԓы, пӑ ԓыв мӑтсәт. Пӑ ԓывиԓаԓа йастәс: «Йушән кўтәӈа ӑԓ йўваты».

25Ԓыв Египет мўв эԓты мӑтсәт пӑ Ханаан мўва Иаков ащеԓ хŏща йŏхәтсәт,

26пӑ айкеԓ тусәт, щиты йастәсәт: «Иосиф ԓыԓәӈ пӑ Египет мўв ԓŏватән ун кущайа уԓ». Иаков ԓыԓәԓ йэрмәс, пӑ ԓўв ԓывиԓаԓа ӑт эвԓәс.

27Щӑԓта, хун ԓыв ԓўвеԓа Иосиф йасӈәт пŏтәртсәԓәԓ, мўй ԓўв йастыԓыйәс, пӑ щӑԓта, хун Иосифән ԓўвеԓ туты китәм колесница ԓовәӈ ухԓәт кащаԓәс, Иаков ащеԓ ԓыԓәԓ ԓӑщкама йис,

28пӑ Израиль йастәс: «Мета щи, тӑрмәԓ, Иосиф пŏхем ԓыԓәӈ; мӑнԓәм пӑ пӑртэм йэԓпийән ԓўвеԓ ватԓэм».


предыдущая глава Глава 45 следующая глава