Your word is a lamp to my feet

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ОԒӘӇ ЭԒТЫ НЭПЕК

Глава 37

Иосиф уԓмәт

1Иаков Ханаан мўвән ус, хŏта ащеԓ па мўв эԓты йŏхтәм ŏта ус.

2Тӑм Иаков рут уԓәпса эԓты пŏтәр. Ԓапәтхŏщйаӈ тӑԓ ԓŏват энәмты пŏх Иосиф тащ шавиман йайԓаԓ пиԓән йӑӈхәс, ащеԓ имеӈӈән пŏхәт пиԓән, Валла пŏхәт пӑ Зелфа пŏхәт пиԓән. Ащеԓа Иосиф йайԓаԓ эԓты пŏләщ тутԓыман йӑӈхәс.

3Йайԓаԓ кўтән Иосиф пŏхәԓ Израиль мет сӑма мосман тӑйсәԓы, ԓўв пирщамәмаԓән щи пŏхәԓ сэма питәс, щишән, хŏрамәӈ сŏхән ԓўвеԓ версәԓы.

4Йайԓаԓән мŏштәса, ащеԓ ԓўвеԓ пŏхԓаԓ кўтән мет сӑма мосман тӑйԓәԓы; Иосиф ԉикән этты питсэԓ пӑ йӑм щирән ԓўв пиԓәԓән пŏтәртты ӑт верәтсәт.

5Ипуш Иосиф уԓәм вантәс, пӑ йайԓаԓа пŏтәртсәԓы; щи йўпийән мет такан ԉикән этты питса.

6Ԓўв ԓывиԓаԓа йастәс: «Ма вантәм уԓмем хуԓәнтаты:

7ԋаԋ тŏрән энәмты хӑр кўтәпән мўӈ ԋаԋ тŏрән мŏнталэт йӑрԓув; пӑ ма йӑрәм ԋаԋ тŏрән мŏнталэм нŏх ԓойәс пӑ тўӈа ԓойәс, нын ԋаԋ тŏрән мŏнталыԓән пӑ керәтман ԓойсәт пӑ ма йӑрәм ԋаԋ тŏрән мŏнталэм пеԓа, ŏх пŏнман, иԓ ԋўрсәт».

8Йайԓаԓ ԓўвеԓа йастәсәт: «Нӑӈ мўй мўӈ нўмпевән хона питԓән? Мўӈ мўй нӑӈ иԓпенән питԓув?» Щи уԓмәԓ пӑ йасәӈԓаԓ урәӈән мет таканшәк ԉикән этты питса.

9Щӑԓта кимет уԓәм па вантәс, йайԓаԓа пŏтәртсәԓы, щиты йастәс: «Щиты ус, ма уԓәм па ватсәм: хӑтәԓ пӑ тыԓәщ пӑ ихŏщйаӈ хус ма шŏмайэм, ŏх пŏнман, иԓ ԋўрсәт».

10Ащеԓа пŏтәртсәԓы пӑ йайԓаԓа ищи; ащеԓән ԉавәттәса пӑ йастәса: «Мўй щимәщ уԓәм нӑӈ ватсән? Мўй щирән ма пӑ нӑӈ аԋԏэн, пӑ нӑӈ йайԓан нӑӈ йэԓпенән мўв унты, ŏх пŏнман, иԓ ԋўрты йŏхәтԓув?»

11Йайԓаԓ ԓўв пеԓайәԓ ўшмащсәт, ащеԓән пӑ щи йасәӈ ӑт йŏрэмәса.

Йайԓаԓән Иосиф тыныԓа

12Йайԓаԓ Сихем вош ԉэпән ащеԓ тащ шависәт.

13Израиль Иосифа йастәс: «Йайԓан ӑԓт Сихемән тащ шавиԓәт? Йӑӈха, ма нӑӈен ԓыв хŏщайэԓ китԓэм». Ԓўв йастәс: «Йӑна щи, ма йӑхԓәм».

14Израиль ԓўвеԓа йастәс: «Йӑӈха, ванты, йайԓан тўмтакәт мўй пӑ тащеԓ тӑԓаӈ мўй, пӑ айкеԓ мӑнэма тўва». Хеврон лот мўв эԓты ԓўвеԓ китсәԓы; ԓўв пӑ Сихема йŏхтәс.

15Щита мўв хӑрән ԓўв тӑпәс пӑ ԓўвеԓ уйтәм хŏйатән иԋщәсса: «Мўй нӑӈ кӑшԓән?»

16Ԓўв йастәс: «Ма йайԓам кӑшԓәм, мӑнэма йасты, хŏта ԓыв тащ шавиԓәт?»

17Щи хŏйат йастәс: «Ԓыв тӑԓта мӑтсәт, ма хуԓтсэм, хŏты ԓыв пŏтәртсәт: ‘Дофана мӑнԓув’». Щиты Иосиф йайԓаԓ йуш хўват мӑнәс, пӑ Дофан вош ԉэпән ԓывиԓаԓ уйәтсәԓы.

18Ԓыв хўвәԓта ԓўвеԓ кащаԓәсэԓ, пӑ ԓўв вана йитаԓ сыс, ԓыв нумәсты питсәт, хŏты ԓўвеԓ веԓты.

19Щӑԓта ԓыв кўтэԓән йастәсәт: «Уԓәм вантәм ŏт йиԓ;

20ин мӑнԓув пӑ ԓўвеԓ веԓԓэв, мӑтты мўв ўса йўвәтԓэв, пӑ йастәԓув, ут войән ԓэса; щи пŏрайән ватԓэв, ԓўв уԓәмԓаԓ мўйа йиԓәт».

21Щит Рувим йайәԓән хуԓса пӑ атәм нŏмәсԓаԓ эԓты ԓўвеԓ шависԓы, пӑ щиты йастәс: «Ԓўвеԓ ӑт веԓԓэв».

22Рувим ԓывиԓаԓа йастәс: «Ўр ӑԓ шошматы; тӑм мўв ўса таԓ йикԓы мўвән йўвтаԓән, туп йошән аԓ кетмаԓән». Щиты ԓўв пŏтәртәс, ԓыв йошԓаԓ эԓты ԓўвеԓ шавиты пӑ ащеԓ хŏща ԓўвеԓ йŏхтәптәты урәӈән.

23Иосиф йайԓаԓ хŏща йŏхәтмаԓән, ԓыв ԓўв хŏрамәӈ сŏхәԓ ԓўв эԓтэԓ нŏх менәпсэԓ,

24пӑ ԓўвеԓ ўсэԓ пӑ мўв ўса йўвәтсэԓ; щи мўв ўс таԓ ус, йик щита ӑнтом ус.

25Ԓыв пӑ ԓэты омәссәт, пӑ ӑӈкәртмеԓән, кащаԓәсэԓ, хŏты Галаад мўв эԓты измаил йох онас йиԓ, йӑма авты стиракс йўх ух, бальзам пӑ ладан пŏрмасәт верблюдәт туԓәт: Египет мўва щит тўвман мӑнԓәт.

26Щӑԓта Иуда йайԓаԓа йастәс: «Мўй ŏнтас, апщев пӑратԓэв пӑ ԓўв ўрәԓ хӑԋатԓэв?

27Мӑнԓув пӑ измаил йоха ԓўвеԓ тыныԓэв, мўӈ йошԓувән ԓўвеԓ ӑт кетәмԓэв, ищипа ԓўв мўӈ апщев, ищи мўӈ ўрэв». Йайԓаԓ ԓўв пеԓайәԓ хўԓтмәсәт.

28Хун Мадиан мўвәӈ тынасты йох ванамәсәт, йайԓаԓ мўв ўс эԓты Иосиф нŏх таԓсэԓ пӑ измаил йоха хус щел ŏх сӑхат тынысэԓ; ԓыв пӑ Иосиф Египта тусэԓ.

29Рувим щи мўв ўс хŏща па йŏхтәс; пӑ Иосиф мўв ўсән ӑнтом. Щит кащаԓәмаԓ кемән, ԓўв ԓўмтәмԓаԓ мӑншисԓы,

30апщиԓаԓ хŏща йŏхԓы йŏхтәс пӑ йастәс: «Энәмты пŏхев ӑнтом, ма пӑ, хŏԓта ма мӑнԓәм?»

31Ԓыв Иосиф сŏх ўсэԓ, козёл вой хŏрсэԓ пӑ щи ўрән сŏхәԓ ԋŏсәтсэԓ;

32щӑԓта щи хŏрамәӈ сŏх ащеԓа китсэԓ, пӑ йастәсәт: «Мўӈ тӑм уйәтсув; ванты, нӑӈ пŏхен сŏх мўй пӑ ӑнтом?»

33Ԓўв сŏхәԓ мŏштәсԓы пӑ йастәс: «Тӑм ма пŏхем сŏх; ут войән ԓўв ԓэса; аԓт пӑ Иосиф войәтән лакки мӑншиса».

34Иаков ԓўмтәмԓаԓ мӑншисԓы, уԓттӑхты хир хŏрпи сох ӑтпәԓа ԓумтәс пӑ ар хӑтәԓ пŏхәԓ эԓты хоԓԓәс.

35Эвиԓаԓ, пŏхԓаԓ хŏԓ ӑктәщсәт, ԓўвеԓ щаԉәтты урәӈән; ԓўв пӑ хуԓәтты ӑт ԓӑӈхас пӑ йастәс: «Тӑмиты хощман пŏхем хŏща иԓта турма мӑнԓәм». Щиты ащеԓ ԓўв эԓтэԓ хоԓԓәс.

36Иосиф пӑ Мадиан мўв хŏйатәтән Египет мўвән Потифар нэмпи ун кущайа тыныса, фараон шавиты йох кущайа.


предыдущая глава Глава 37 следующая глава