Your word is a lamp to my feet

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ОԒӘӇ ЭԒТЫ НЭПЕК

Йэшәк ԓўӈәтты хŏйат! Нӑӈ йошенән хӑнты йасӈа тŏлмащԓәм Оԓәӈ эԓты нэпек (Бытие) катәԓԓән, щит Моисей нэмпи хŏйат оԓәӈ нэпек. Оԓәӈ эԓты нэпек Библияйа, Нэпекәт Нэпека ԓŏӈәԓтман уԓ. Библия, хӑнты щирән Йэмәӈ Нэпек, па нэпекәт пиԓән артаԓәман, мет такан ԓўӈәтԓа пӑ мир ԓŏватән мосман тӑйԓа.

Кашәӈ хŏйат, хŏта кепа ԓўв ат ус, мӑты йасәӈән кепа ԓўв ат пŏтәртәс пӑ хŏты кепа ат эвԓәс ԓўв хŏԓна ԓўв мирәԓ йасәӈән Библия ԓўӈәтты верәтәԓ. Хŏйатәт уԓмеԓ хўват ԓэрамтәм верәт эԓты Библия тўӈа-щира йастәԓ: хŏԓща мўӈ, хŏйатәт, тыйсув, мўй урәӈән мўӈ уԓԓув, мўйа мўв ԓŏватән ар атәм вер, пӑртэв йўпийән мўй мўӈ пиԓэвән питәԓ.

Библияйа ԓŏӈәԓтәм нэпекәт ар сот тӑԓ хўват нэпек хӑшты ар хŏрпи хŏйатәтән хӑшсайәт. Щита пŏтәртса, мўй верәт тыйиԓысәт мўв опсантәм пŏра эԓты тӑм йис нупәт оԓәӈ сот тӑԓ унты. Йис Йастантәпса пӑ Йӑԓәп Йастантәпса – щит Библия нэпекән кӑт ун йӑт. Йӑԓәп Йастантәпсайән Иисус Христос уԓәпса пӑ Ԓўв верәԓ йэԓԓы тўвәм хŏйатԓаԓ эԓты пŏтәртԓа, христианәт церковь тыйәм вер пӑ йэԓԓы Йӑм Айкеԓ тўвәм вер эԓты пŏтәртԓа.

Йис Йастантәпса хŏща ԓŏӈәԓтман уԓԓәт Моисей вет нэпек, йис уԓәпса эԓты нэпекәт, Турәм айкеԓ туты хŏйатәт нэпекәт пӑ поэма хŏрпи нэпекәт. Оԓәӈ эԓты нэпек, щит ӑнта туп Библия оԓәӈ нэпек, Йэмәӈ Нэпек (Библия) щит хот пӑты хŏрпи. Щита мўв опсантәм пŏра эԓты пŏтәр мӑнәԓ, хŏйат тыйәԓтәм щир эԓты, хоты хŏйат кӑрэка питәс пӑ щи йўпийән шук тўвәм уԓәпсайәԓ эԓты пӑ щӑԓта хŏты хŏйат Турәм пиԓән ус.

Оԓәӈ эԓты нэпекән кӑт шуп уԓ: 1 глава эԓты 11 глава унты хӑшман уԓԓа, хŏты Турәм мўв пӑ хŏйат тыйәԓтәс, Адам пӑ Ева эԓты, Каин эԓты, Авель эԓты, Ной эԓты, ун йик пӑ Вавилон вошән верәм пӑԓ хот эԓты.

Кимет шупәԓән, 12 глава эԓты 50 глава унты, Израиль мир эԓты пŏтәр мӑнәԓ. Авраам, щи мир опращ ики, Турма эвԓәс пӑ Ԓўв пеԓайәԓ хуԓәнтәс. Йэԓԓы пӑ Авраам Исаак пŏхәԓ пӑ Иаков хиԓэԓ эԓты ԓўӈәтты рӑхәԓ. Щӑԓта Иаков кӑтхŏщйаӈ пŏх эԓты пŏтәр мӑнәԓ пӑ ԓыв эԓтыԓаԓ щиԓта Израиль кӑтхŏщйаӈ сыр рут этәс. Щи йўпийән Иаков Иосиф пŏхәԓ эԓты хўв пŏтәр верман уԓ. Ԓўв Египет хон мўвән ун кущайа ус. Мет йухәт Иаков пӑ ԓўв рутәԓ Египет мўвән уԓәм пŏра эԓты хӑшман уԓԓа.

Оԓәӈәӈ тӑм нэпек еврей йасәӈәӈ, щӑԓта грек йасәӈ хӑшман ус. Грекәт тŏлмащԓәты йасәӈ тухәԓ тӑхайәтән хўвшәк еврейәт йасәӈ эԓты, щимәщ тӑхайәтән скобка посәт пŏнман уԓԓәт.

Библия тŏлмащԓәты институт тŏлмащԓәм хŏйата пӑ йасәӈ ԓэщатты хŏйата пӑ хŏԓ щи мŏхета, хŏй тӑм Оԓәӈ эԓты нэпек хӑнты йасәӈән ԓўӈәтты щира верты ԋотәс, пумащипа йастәԓ. Хӑнты хŏйатәт Оԓәӈ эԓты нэпек ԓўӈәтты щир мŏщатмеԓ урәӈән, мўӈ амтәтԓыԓув.

Библия тŏлмащԓәты институт, 2017 тӑԓ

Хельсинки вош

ОԒӘӇ ЭԒТЫ НЭПЕК
(Моисей оԓәӈ нэпек)

Глава 1

Мўв опсантәм щир

1Оԓәӈән Турәм турәм пӑ мўв тыйәԓтәс.

2Мўв ватԓы-хŏрԓы пӑ таԓ ус, пӑтыԓы йиӈкәӈ тӑха нўмпийән пӑтлам ус, Турәм Ԓыԓәԓ йик нўмпийән йӑӈхәс.

3Турәм йастәс: «Нŏвийа ат йиԓ». Пӑ нŏвийа йис.

4Щӑԓта Турәм шийаԓәсԓы, нŏви щит йӑм, пӑ пӑтлам эԓты нŏви атэԓт ўсԓы.

5Турәм нŏви хӑтԓа нэмәтсәԓы, пӑтлам пӑ ата нэмәтсәԓы. Йэтән ус пӑ аԓәӈсӑхат ус: оԓәӈ хӑтәԓ.

6Турәм йастәс: «Йик кўтән турәм ԓŏӈәԓ ат питәԓ, йиӈкәт атэԓт ат ўԓԓы».

7Турәм турәм ԓŏӈәԓ тыйәԓтәс, нўм йиӈкәт иԓта йиӈкәт эԓты атэԓт ўсԓы. Пӑ щиты щи питәс.

8Турәм щи турәм ԓŏӈәԓ турәм хӑра нэмәтсәԓы. Йэтән ус пӑ аԓәӈсӑхат ус: кимет хӑтәԓ.

9Турәм йастәс: «Турәм иԓпийән йиӈкәт и тӑхайа ат ӑктәщԓәт пӑ сорәм тӑха ат этәԓ». Пӑ щиты щи питәс.

10Сорәм тӑха Турәм мўва нэмәтсәԓы, йӑха ӑктәм йиӈкәт щарса нэмәтсәԓы. Турәм шийаԓәсԓы, щит йӑм.

11Турәм йастәс: «Мўв вŏсты тŏрнәт пӑ йўхәт ат энмәԓәԓ, тŏрнәт энәмты сэмәт ат тӑйԓәт пӑ ԓэвпәсәӈ йўхәт, кашәӈ йўх энмәԓтәм ԓэвпәсԓаԓән нохәр сэм ԓўв сырәԓ щирән мўвән ат тӑйәԓ». Пӑ щиты щи питәс.

12Мўв вŏсты тŏрнәт пӑ ԓэвпәсәӈ йўхәт энмәԓтәс: кашәӈ тŏрән тŏрән сэмԓаԓ пиԓән ԓўв сырәԓ щирән; пӑ йўхәт, кашәӈ йўх энмәԓтәм нохәр сэмәӈ ԓэвпәс ԓўв сырәԓ щирән тӑйәс. Турәм шийаԓәсԓы, щит йӑм.

13Йэтән ус пӑ аԓәӈсӑхат ус: хуԓмет хӑтәԓ.

14Щӑԓта Турәм йастәс: «Турәм хӑрән хутԓәты ŏтәт ат питԓәт, ат пӑ хӑтәԓ ԓэра уйәтты урәӈән, пӑ щӑԓта поса ат уԓԓәт: йисәт, тӑԓәт, хӑтԓәт ԓэрапты урәӈән.

15Пӑ турәм хӑрән хутԓәптәты ŏтәта ат питԓәт, мўв хутԓәптәты урәӈән». Пӑ щиты щи питәс.

16Турәм кӑт вŏԓаӈ хутԓәптәты ŏтӈән тыйәԓтәс: уншәк ŏт хӑтәԓән ԓойты урәӈән, айшәк ŏт атән ԓойты урәӈән, пӑ хусәт тыйәԓтәс;

17Турәм щи ŏтәт турәм хӑра ԓэщатсәԓы, мўв хутԓәптәты,

18пӑ ат пӑ хӑтәԓ мŏрт пŏрайән пайтыԓыты, пӑ нŏви пӑ пӑтлам кӑтна тӑйты урәӈән. Турәм шийаԓәсԓы, щит йӑм.

19Йэтән ус пӑ аԓәӈсӑхат ус: ԋӑԓмет хӑтәԓ.

20Турәм йастәс: «Кӑмән хŏрпи ваӈкәтԓыты, ущиԓыты вой тащ йик ат тыйәԓтәԓ, пӑ мўв нўмпийән, турәм хӑр хўват тŏхԓәӈ войәт ат йӑхԓәт».

21Турәм ун хўԓ шикет пӑ ар сыр ваӈкәтԓыты, ущиԓыты йикән вŏшиты арат ԓыԓәӈ ŏт пӑ ар сыр тŏхԓәӈ вой тыйәԓтәс. Турәм шийаԓәсԓы, щит йӑм.

22Турәм ԓывиԓаԓ йӑмән мӑсԓы, пŏтәртман: «Пŏшхащаты, ара йўваты, щарсәтән йиӈкәт тэкнәптаԓән, тŏхԓәӈ войәт мўв хŏща па ара ат йиԓәт».

23Йэтән ус пӑ аԓәӈсӑхат ус: ветмет хӑтәԓ.

24Турәм йастәс: «Ԓыԓәӈ ŏтәт сырԓаԓ щирән мўв ат тыйәԓтәԓ: йош войәт, ут войәт, ваӈкәтԓыты, ущиԓыты, хухәтԓыты войәт хŏԓ сырԓаԓ щирән». Пӑ щиты щи питәс.

25Ут войәт сырԓаԓ щирән, йош войәт сырԓаԓ щирән, ваӈкәтԓыты, ущиԓыты, хухәтԓыты войәт сырԓаԓ щирән Турәм тыйәԓтәс. Турәм шийаԓәсԓы, щит йӑм.

26Турәм йастәс: «Мўӈ хŏрасэв пӑ Мўӈ хŏрпев хŏйат тыйәԓтԓув. Пӑ щӑԓта щарәс хўԓәт нўмпийән, тŏхԓәӈ войәт нўмпийән, йош войәт нўмпийән, омәсты мўв нўмпийән, мўвән ваӈкәтԓыты, ущиԓыты, хухәтԓыты войәт нўмпийән кущайа ԓўв ат уԓ».

27Турәм хŏйат Ԓўв хŏрасәԓ щира, Турәм хŏрас щира, тыйәԓтсәԓы; йох хŏйат пӑ нэ хŏйат тыйәԓтәс.

28Турәм ԓынан йӑмән мӑсԓы пӑ Турәм ԓынана йастәс: «Пŏшхащатән, ара йўваты, мўв тэкнәптаԓән, мўв ԓŏватән кущайа уԓаты, пӑ щарәс хўԓәт, пӑ тŏхԓәӈ войәт нўмпийән, пӑ мўвән ваӈкәтԓыты, ущиԓыты, хухәтԓыты войәт нўмпийән кущайа уԓатән».

29Турәм йастәс: «Тӑта щи, мўв ԓŏватән энәмты кӑмән хŏрпи ԓат сэмәӈ тŏрән пӑ кӑмән хŏрпи ԓэвпәсәӈ йўх, мўва йŏвәԓты нохәр сэмԓаԓ пиԓән Ма нынана мӑсәм: щит нынана ԓэтŏта питәԓ.

30Ут войәта, тŏхԓәӈ войәта пӑ ар сыр ваӈкәтԓыты, ущиԓыты, хухәтԓыты войәта – хŏԓ ԓыԓәӈ войәта энәмты тŏрнәт, лыптәт ԓэтŏта Ма мӑсәм». Щиты щи питәс.

31Щӑԓта Турәм ватсәԓы, мўй Ԓўв тыйәԓтәс пӑ щит шек йӑм. Йэтән ус пӑ аԓәӈсӑхат ус: хутмет хӑтәԓ.


*a 1:1 Турәм – щит Нŏви Турәм, Нўм Турәм, Сорԋи Турәм, Турәм Ащи;

*б 1:6 турәм ԓоӈәԓ – небесная твердь;


предыдущая глава Глава 1 следующая глава